ਚੰਡੀਗੜ੍ਹ:ਬਠਿੰਡਾ ਦੇ ਥਾਣਾ ਫੂਲ ਅਧੀਨ ਪੈਂਦੇ ਪਿੰਡ ਹਮੀਰਗੜ੍ਹ ਵਿਖੇ ਤਿੰਨ ਬੱਚਿਆਂ ਦੀ ਹੱਤਿਆ ਕਰਕੇ ਪਿਤਾ ਨੇ ਖੁਦ ਵੀ ਫਾਹਾ ਲੈ ਕੇ ਆਪਣੀ ਜੀਵਨ ਲੀਲਾ ਸਮਾਪਤ ਕਰ ਲਈ। ਮ੍ਰਿਤਕ ਨੇ ਸੁਸਾਈਡ ਨੋਟ 'ਚ ਪਤਨੀ ਦੀ ਮੌਤ ਤੋਂ ਬਾਦ ਘਰ ਵਿੱਚ ਬੱਚਿਆਂ ਦੇ ਪਾਲਣ ਪੋਸ਼ਣ ਕਰਨ 'ਚ ਔਖੇ ਸਮੇਂ ਸਾਥ ਨਾ ਦੇਣ 'ਤੇ ਰਿਸ਼ਤੇਦਾਰਾਂ 'ਤੇ ਗਿਲਾ ਕੀਤਾ ਹੈ। ਸੂਚਨਾ ਮਿਲਦੇ ਹੀ ਪੁਲਿਸ ਦੇ ਸੀਨੀਅਰ ਮੌਕੇ ਤੇ ਪਹੁੰਚੇ 'ਤੇ ਤਿੰਨੋਂ ਬੱਚਿਆਂ ਸਣੇ ਪਿਤਾ ਦੀਆਂ ਲਾਸ਼ਾਂ ਕਬਜ਼ੇ ਵਿੱਚ ਲੈ ਕੇ ਪੋਸਟਮਾਰਟਮ ਦੇ ਲਈ ਸਿਵਲ ਹਸਪਤਾਲ ਪਹੁੰਚਾ ਦਿੱਤੀਆਂ ਹਨ। ਪੁਲਿਸ ਮਾਮਲੇ ਦੀ ਹਰ ਪਹਿਲੂ 'ਤੇ ਜਾਂਚ ਕਰ ਰਹੀ ਹੈ। ਇਸ ਹਾਦਸੇ ਨਾਲ ਪਿੰਡ ਵਿੱਚ ਸੋਗ ਦੀ ਲਹਿਰ ਹੈ।
ਮਿਲੀ ਜਾਣਕਾਰੀ ਦੇ ਅਨੁਸਾਰ ਹਮੀਰਗੜ੍ਹ ਦੇ ਰਹਿਣ ਵਾਲੇ ਬੇਅੰਤ ਸਿੰਘ ਦੀ ਪਤਨੀ ਲਵਪ੍ਰੀਤ ਕੌਰ ਦੀ ਕੁਝ ਸਮਾਂ ਪਹਿਲਾਂ ਬਿਮਾਰੀ ਕਾਰਨ ਮੌਤ ਹੋ ਗਈ ਸੀ। ਪਤਨੀ ਦੀ ਮੌਤ ਤੋਂ ਬਾਦ ਤਿੰਨੋਂ ਬੱਚਿਆਂ ਦੇ ਪਾਲਣ ਪੋਸ਼ਣ ਕਰਨ ਦੀ ਜਿੰਮੇਦਾਰੀ ਬੇਅੰਤ ਸਿੰਘ 'ਤੇ ਆ ਗਈ। ਬੱਚੇ ਛੋਟੇ ਹੋਣ ਕਾਰਨ ਬੇਅੰਤ ਸਿੰਘ ਕੰਮ 'ਤੇ ਵੀ ਨਹੀਂ ਜਾ ਪਾ ਰਿਹਾ ਸੀ ਜਿਸ ਕਾਰਨ ਉਹ ਬਹੁਤ ਜ਼ਿਆਦਾ ਪ੍ਰੇਸ਼ਾਨ ਰਹਿੰਦਾ ਸੀ। ਇਸੇ ਪ੍ਰੇਸ਼ਾਨੀ ਦੇ ਚੱਲਦੇ ਬੇਅੰਤ ਸਿੰਘ ਨੇ 7 ਸਾਲਾ ਲੜਕਾ ਪ੍ਰਭਜੋਤ ਸਿੰਘ, ਤਿੰਨ ਸਾਲਾ ਬੱਚੀ ਅਰਸ਼ ਕੌਰ 'ਤੇ ਇੱਕ ਸਾਲ ਦੀ ਬੱਚੀ ਖੁਸ਼ੀ ਨੂੰ ਪਹਿਲਾਂ ਫਾਹੇ ਨਾਲ ਲਟਕਾ ਦਿੱਤਾ। ਉਸਤੋਂ ਬਾਦ ਉਸਨੇ ਖੁਦ ਵੀ ਪੱਖੇ ਨਾਲ ਫਾਹਾ ਲੈ ਲਿਆ।
ਵੀਰਵਾਰ ਸਵੇਰੇ ਜਦੋਂ ਪਰਿਵਾਰ ਦੇ ਚਾਰੇ ਮੈਂਬਰਾਂ ਵਿੱਚੋਂ ਕੋਈ ਵੀ ਬਾਹਰ ਨਾ ਨਿਕਲਿਆ ਤਾਂ 11 ਵਜੇ ਤੋਂ ਬਾਦ ਇਲਾਕੇ ਦੇ ਲੋਕਾਂ ਨੇ ਖਿੜਕੀ ਰਾਹੀਂ ਕਮਰੇ ਅੰਦਰ ਦੇਖਿਆ ਤਾਂ ਤਿੰਨੋਂ ਬੱਚਿਆਂ ਸਣੇ ਪਿਤਾ ਅਲੱਗ ਅਲੱਗ ਫਾਹੇ ਨਾਲ ਲਟਕ ਰਹੇ ਸਨ। ਇਸਤੋਂ ਬਾਦ ਲੋਕਾਂ ਨੇ ਇਕੱਠੇ ਹੋ ਕੇ ਪੁਲਿਸ ਨੂੰ ਸੂਚਿਤ ਕੀਤਾ। ਪੁਲਿਸ ਨੇ ਲੋਕਾਂ ਦੀ ਮੌਜੂਦਗੀ ਵਿੱਚ ਕਮਰੇ ਦਾ ਦਰਵਾਜਾ ਤੋੜ ਕੇ ਚਾਰੇ ਲਾਸ਼ਾਂ ਨੂੰ ਫਾਹੇ ਤੋਂ ਉਤਾਰਿਆ 'ਤੇ ਮੌਕੇ ਤੋਂ ਇੱਕ ਸੁਸਾਈਡ ਨੋਟ ਵੀ ਬਰਾਮਦ ਕੀਤਾ।
ਮੀਡੀਆ ਨਾਲ ਗੱਲਬਾਤ ਕਰਦੇ ਹੋਏ ਫੂਲ ਡੀਐਸਪੀ ਜਸਵੀਰ ਨੇ ਦੱਸਿਆ ਕਿ ਮੁਢਲੀ ਜਾਂਚ ਵਿੱਚ ਮੌਕੇ ਤੋਂ ਬਰਾਮਦ ਹੋਏ ਸੁਸਾਈਡ ਨੋਟ ਵਿੱਚ ਰਿਸ਼ਤੇਦਾਰਾਂ 'ਤੇ ਗਿਲਾ ਕੀਤੀ ਹੈ ਜਿਸ ਵਿੱਚ ਉਸਨੇ ਲਿਖਿਆ ਔਖੇ ਵੇਲੇ ਕਿਸੇ ਨੇ ਵੀ ਰਿਸ਼ਤੇਦਾਰ ਨੇ ਉਸਦੇ ਪਰਿਵਾਰ 'ਤੇ ਉਸਦੀ ਬਾਂਹ ਨਹੀਂ ਫੜੀ। ਫਿਰ ਵੀ ਪੁਲਿਸ ਮਾਮਲੇ ਦੀ ਤੈਅ ਤੱਕ ਜਾਂਚ ਕਰੇਗੀ।