ਗੁਰਦਾਸਪੁਰ: ਪੁਲਿਸ ਨੇ ਤਿੰਨ ਕਾਰਵਾਈਆਂ ਵਿੱਚ 18.10 ਗ੍ਰਾਮ ਹੈਰੋਇਨ ਬਰਾਮਦ ਕਰਕੇ ਤਿੰਨਾਂ ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਕੀਤਾ। ਤਿੰਨਾਂ ਦੋਸ਼ੀਆਂ ਦੇ ਖ਼ਿਲਾਫ਼ ਸਬੰਧਤ ਥਾਣਿਆਂ ਵਿੱਚ ਕੇਸ ਦਰਜ ਕਰ ਲਿਆ ਗਿਆ ਹੈ। ਥਾਣਾ ਪੁਰਾਣਾ ਸ਼ਾਲਾ ਦੇ ਐਸਆਈ ਬਲਬੀਰ ਸਿੰਘ ਸਮੇਤ ਪੁਲਿਸ ਪਾਰਟੀ ਨੇ ਨਡਾਲਾ ਪੁਲੀ ਨੇੜੇ ਨਾਕਾਬੰਦੀ ਕੀਤੀ ਹੋਈ ਸੀ। ਇਸ ਦੌਰਾਨ ਦੋਸ਼ੀ ਰਾਹੁਲ ਚੌਹਾਨ ਉਰਫ ਸੁਨਿਆਰਾ ਪੁੱਤਰ ਬਲਰਾਮ ਚੌਹਾਨ ਵਾਸੀ ਪਾਦਿਆ ਵਾਲੀ ਗਲੀ (ਫਤਿਹਗੜ ਚੂੜਿਆਂ) ਹਾਲ ਵਾਸੀ ਪੁਰਾਣਾ ਸ਼ਾਲਾ ਨੂੰ ਸ਼ੱਕ ਦੇ ਆਧਾਰ ‘ਤੇ ਕਾਬੂ ਕੀਤਾ
ਉਸਦੀ ਤਲਾਸ਼ੀ ਲਈ। ਦੋਸ਼ੀ ਵੱਲੋਂ ਪਹਿਨੇ ਪਜਾਮੇ ਦੀ ਜੇਬ ਵਿਚੋਂ ਲਿਫਾਫ਼ਾ ਮਿਲਿਆ, ਜਿਸ ਵਿੱਚੋਂ 7 ਗ੍ਰਾਮ ਹੈਰੋਇਨ ਬਰਾਮਦ ਹੋਈ। ਥਾਣਾ ਦੀਨਾਨਗਰ ਦੇ ਏਐਸਆਈ ਸੁਰਜੀਤ ਸਿੰਘ ਸਮੇਤ ਪੁਲਿਸ ਦਸਤੇ ਨੇ ਦੋਸ਼ੀ ਵਿਕਰਾਂਤ ਪੁੱਤਰ ਸੋਮਨਾਥ ਵਾਸੀ ਡੀਡਾ ਸਾਂਸਿਆਂ ਨੂੰ ਟੀ-ਪੁਆਇੰਟ ਪਿੰਡ ਸਿੰਘੋਵਾਲ ਤੋਂ ਕਾਬੂ ਕੀਤਾ। ਜਦੋਂ ਦੋਸ਼ੀ ਦੀ ਤਲਾਸ਼ੀ ਲਈ ਗਈ ਤਾਂ ਦੋਸ਼ੀ ਵੱਲੋਂ ਪਹਿਨੇ ਪਜਾਮੇ ਦੀ ਸੱਜੇ ਜੇਬ ਵਿਚੋਂ ਲਿਫ਼ਾਫ਼ਾ ਮਿਲਿਆ, ਜਿਸ ਵਿੱਚੋਂ 5.10 ਗ੍ਰਾਮ ਹੈਰੋਇਨ ਬਰਾਮਦ ਹੋਈ। ਬਹਿਰਾਮਪੁਰ ਥਾਣੇ ਦੇ ਏਐਸਆਈ ਹਰੀਸ਼ ਕੁਮਾਰ ਸਣੇ ਪੁਲਿਸ ਪਾਰਟੀ ਨੇ ਟੀ-ਪੁਆਇੰਟ ਪਿੰਡ ਰਾਮਪੁਰ 'ਤੇ ਨਾਕਾਬੰਦੀ ਕੀਤੀ ਹੋਈ ਸੀ। ਇਸ ਦੌਰਾਨ ਦੋਸ਼ੀ ਰਿੰਕੂ ਉਰਫ ਟਿੰਡ ਪੁੱਤਰ ਸੰਦੂਰੀ ਲਾਲ ਵਾਸੀ ਦੋਦਵਾਂ ਨੂੰ ਸ਼ੱਕ ਹੋਣ ‘ਤੇ ਕਾਬੂ ਕੀਤਾ। ਦੋਸ਼ੀ ਕੋਲ ਨਸ਼ੀਲੇ ਪਦਾਰਥ ਹੋਣ ਦਾ ਸ਼ੱਕ ਹੋਣ ‘ਤੇ ਏਐਸਆਈ ਗੁਰਨਾਮ ਸਿੰਘ ਨੂੰ ਸੂਚਿਤ ਕੀਤਾ ਗਿਆ । ਜਦੋਂ ਟੀਮ ਨੇ ਦੋਸ਼ੀ ਦੀ ਤਲਾਸ਼ੀ ਲਈ ਤਾਂ ਉਸ ਕੋਲੋਂ ਮਿਲੇ ਲਿਫਾਫੇ ਵਿਚੋਂ 6 ਗ੍ਰਾਮ ਹੈਰੋਇਨ ਬਰਾਮਦ ਹੋਈ।