ਨੂਰਪੁਰ ਬੇਦੀ:ਪੰਜਾਬ ਵਿੱਚ ਕੈਪਟਨ ਸਰਕਾਰ ਦੇ ਬਣਨ ਤੋਂ ਬਾਅਦ ਮੁੱਖ ਮੰਤਰੀ ਵਲੋਂ ਇਹ ਵਾਅਦਾ ਕੀਤਾ ਗਿਆ ਸੀ ਕਿ ਸੂਬੇ ਦੇ ਨੌਜਵਾਨਾਂ ਨੂੰ ਨਸ਼ਿਆਂ ਤੋਂ ਰੋਕਣ ਲਈ ਸਰਕਾਰੀ ਹਸਪਤਾਲਾਂ ਵਿੱਚ ਇਹਨਾਂ ਨੂੰ ਮੁਫਤ ਦਵਾਈ ਦੇ ਕੇ ਨਸ਼ੇ ਦੇ ਆਦੀ ਨਸ਼ੇੜੀਆਂ ਨੂੰ ਨਸ਼ਿਆਂ ਤੋਂ ਮੁਕਤ ਕੀਤਾ ਜਾਵੇਗਾ। ਪਰ ਹੁਣ ਨਸ਼ੇੜੀ ਸਰਕਾਰੀ ਨਸ਼ੇ ਦੇ ਆਦੀ ਬਣ ਚੁੱਕੇ ਹਨ। ਸਰਕਾਰ ਵਲੋਂ ਇਹ ਨਸ਼ੇ ਦੀਆਂ ਗੋਲੀਆਂ ਦੇਣ ਮੌਕੇ ਕੋਈ ਨੀਤੀ ਨਹੀ ਬਣਾਈ ਗਈ ਕਿ ਇਹ ਗੋਲ਼ੀਆਂ ਕਦੋਂ ਤੱਕ ਨਸ਼ੇੜੀਆਂ ਨੂੰ ਦਿੱਤੀਆਂ ਜਾਣਗੀਆਂ। ਸਰਕਾਰ ਦੇ 3 ਸਾਲ ਬੀਤ ਜਾਣ ਤੋਂ ਬਾਅਦ ਵੀ ਇਹ ਗੋਲੀਆਂ ਸਰਕਾਰੀ ਹਸਪਤਾਲਾਂ ਵਿਚ ਉਹਨਾਂ ਨਸ਼ੇੜੀਆਂ ਨੂੰ ਮਿਲਦੀਆਂ ਹਨ ਜਿਹਨਾਂ ਦੇ ਪੱਕੇ ਤੌਰ ਤੇ ਕਾਰਡ ਬਣਾਏ ਗਏ ਹਨ। ਇਹਨਾਂ ਨਸ਼ੇੜੀਆਂ ਵਲੋਂ ਨਸ਼ਾ ਛੱਡਣ ਦੀ ਬਜਾਏ ਇਹਨਾਂ ਗੋਲ਼ੀਆਂ ਦੇ ਨਾਲ ਨਾਲ ਭੁੱਕੀ ਆਦਿ ਹੋਰ ਨਸ਼ੀਲੀਆਂ ਚੀਜ਼ਾਂ ਦੀ ਵਰਤੋਂ ਕਰਕੇ ਆਪਣੇ ਨਸ਼ੇ ਦੀ ਡੋਜ਼ ਨੂੰ ਹੋਰ ਵਧਾ ਦਿੱਤਾ ਗਿਆ ਹੈ। ਨਸ਼ੇੜੀਆਂ ਨੂੰ ਬਿਨ੍ਹਾ ਕਿਸੀ ਰੋਕ ਟੋਕ ਤੋਂ ਹਫਤੇ ਦੀਆਂ 30 ਤੋਂ 40 ਗੋਲੀਆਂ ਮਿਲ ਜਾਂਦੀਆਂ ਹਨ। ਤਿੰਨ ਸਾਲ ਸਰਕਾਰੀ ਗੋਲ਼ੀਆਂ ਖਾਣ ਵਾਲੇ ਇਹਨਾਂ ਨਸ਼ੇੜੀਆਂ ਵਿੱਚੋ ਕਿੰਨੇ ਨਸ਼ੇੜੀ ਨਸ਼ਾ ਛੱਡ ਚੁੱਕੇ ਹਨ ਇਸ ਦਾ ਸਿਹਤ ਵਿਭਾਗ ਕੋਲ ਕੋਈ ਰਿਕਾਰਡ ਨਹੀ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਇਹ ਆਪਣੇ ਕਿਸਮ ਦੀ ਪਹਿਲੀ ਬਿਮਾਰੀ ਹੈ ਜਿਸ ਦੀ ਦੁਵਾਈ ਖੁਆਣ ਦੀ ਮਿਆਦ ਦਾ ਕੋਈ ਸਮਾਂ ਤੈਅ ਨਹੀ ਹੈ। ਸਿਹਤ ਵਿਭਾਗ ਦੀ ਇਸ ਗੱਲ ਤੇ ਲੋਕਾਂ ਵਿਚ ਸਵਾਲ ਉੱਠ ਰਹੇ ਹਨ ਕਿ ਅਗਰ ਸਰਕਾਰ ਵਲੋਂ ਮੁਫਤ ਡੋਜ਼ ਸਪਲਾਈ ਕੀਤੀ ਜਾ ਰਹੀ ਹੈ ਤਾਂ ਉੇਸ ਦੇ ਨਤੀਜੇ ਕੀ ਆਏ ਹਨ ਉਹ ਵੀ ਪਤਾ ਕਰਨਾ ਚਾਹੀਦਾ ਹੈ।
ਨਸ਼ੇੜੀਆਂ ਲਈ ਧੰਦਾ ਬਣੀਆਂ ਸਰਕਾਰੀ ਗੋਲੀਆਂ : ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਕਈ ਵੱਡਿਆਂ ਘਰਾਂ ਦੇ ਕਾਕੇ ਜੋ ਕਿ ਨਸ਼ੇ ਦੇ ਆਦੀ ਦੱਸੇ ਜਾਂਦੇ ਹਨ ਪਰ ਉਹ ਆਪਣੇ ਸਮਾਜਕ ਰੁਤਬੇ ਕਾਰਨ ਆਪਣਾ ਨਸ਼ੇੜੀ ਦਾ ਕਾਰਡ ਸਰਕਾਰੀ ਹਸਪਤਾਲ ਤੋਂ ਨਹੀ ਬਣਾਉਂਦੇ । ਉਹ ਆਪਣੇ ਨਸ਼ੇ ਭੁੱਕੀ ਅਤੇ ਅਫੀਮ ਆਦਿ ਦੀ ਡੋਜ਼ ਨੂੰ ਦੁੱਗਣਾ ਕਰਨ ਲਈ ਸਰਕਾਰੀ ਕਾਰਡ ਧਾਰਕਾਂ ਤੋਂ 100 ਰੁਪਏ ਪ੍ਰਤੀ ਗੋਲੀ ਜਾਂ ਸ਼ਾਮ ਨੂੰ ਲਾਲਪਰੀ ਦਾ ਅਧੀਆਂ ਦੇ ਕੇ ਨਸ਼ੀਲੀਆਂ ਗੋਲ਼ੀਆਂ ਹਾਸਲ ਕਰ ਲੈਂਦੇ ਹਨ। ਜਾਣਕਾਰੀ ਅਨੁਸਾਰ ਕੁਝ ਨਸ਼ੇੜੀ ਇਹ ਗੋਲੀਆਂ ਹੋਰਨਾਂ ਨੂੰ ਵੇਚ ਰਹੇ ਹਨ।
ਕੀ ਕਿਹਾ ਐਸ.ਐਮ.ਓ ਨੇ: ਇਸ ਸਬੰਧ ਵਿੱਚ ਜਦੋਂ ਸੀਨੀਅਰ ਮੈਡੀਕਲ ਅਫਸਰ ਨੂਰਪੁਰ ਬੇਦੀ ਡਾ.ਸ਼ਿਵ ਕੁਮਾਰ ਨਾਲ ਗੱਲ ਕੀਤੀ ਤਾਂ ਉਹਨਾਂ ਕਿਹਾ ਕਿ ਨਸ਼ੇੜੀ ਲੋਕਾਂ ਦੀ ਸੂਚਨਾ ਨਹੀ ਦੇ ਸਕਦੇ ਪਰ ਇਸ ਹਸਪਤਾਲ ਵਿੱਚ 40 ਮਰੀਜ਼ਾਂ ਦੇ ਕਾਰਡ ਬਣੇ ਹੋਏ ਹਨ। ਜਿਨ੍ਹਾਂ ਨੂੰ ਸਿਹਤ ਵਿਭਾਗ ਵਲੋਂ ਸਰਕਾਰ ਦੀ ਹਦਾਇਤਾਂ ਅਨੁਸਾਰ ਮੁਫਤ ਦਵਾਈਆਂ ਦਿੱਤੀਆਂ ਜਾਂਦੀਆਂ ਹਨ।