ਨਵੀਂ ਦਿੱਲੀ: ਦੇਸ਼ ਵਿੱਚ ਕੋਵਿਡ-19 ਦੀ ਸਥਿਤੀ ਬਦ ਤੋਂ ਬਦਤਰ ਹਾਲਤ ਵੱਲ ਬਦਲ ਰਹੀ ਹੈ ਅਤੇ ਖਾਸ ਕਰ ਕੁਝ ਰਾਜਾਂ ਲਈ ਚਿੰਤਾ ਦਾ ਇੱਕ ਵੱਡਾ ਕਾਰਨ ਹੈ।
ਕੇਂਦਰ ਨੇ ਮੰਗਲਵਾਰ ਨੂੰ ਇਸ ਗੱਲ ’ਤੇ ਜ਼ੋਰ ਦਿੰਦਿਆਂ ਕਿਹਾ ਕਿ ਪੂਰਾ ਦੇਸ਼ ਜ਼ੋਖਮ ਵਿੱਚ ਹੈ ਅਤੇ ਕਿਸੇ ਨੂੰ ਵੀ ਖੁਸ਼ ਨਹੀਂ ਰਹਿਣਾ ਚਾਹੀਦਾ।
ਦੇਸ਼ ਵਿਚ ਕੋਰੋਨਾ ਦੇ ਵਧਦੇ ਮਾਮਲਿਆਂ ਤੇ ਟੀਕਾਕਰਨ ਦੀ ਸਥਿਤੀ ਸਬੰਧੀ ਕੇਂਦਰੀ ਸਿਹਤ ਸਕੱਤਰ ਰਾਜੇਸ਼ ਭੂਸ਼ਣ ਨੇ ਕਿਹਾ ਕਿ ਦੇਸ਼ ਭਰ ਵਿਚ 10 ਜ਼ਿਲ੍ਹੇ ਹਨ, ਜਿਨ੍ਹਾਂ ਵਿਚ ਸਭ ਤੋਂ ਵਧ ਸਰਗਰਮ ਮਾਮਲੇ ਹਨ। ਇਨ੍ਹਾਂ ਵਿੱਚ ਪੁਣੇ, ਮੁੰਬਈ, ਨਾਗਪੁਰ, ਠਾਣੇ, ਨਾਸਿਕ, ਔਰੰਗਾਬਾਦ, ਬੈਂਗਲੁਰੂ ਸ਼ਹਿਰੀ, ਨਾਂਦੇੜ, ਦਿੱਲੀ, ਪੰਜਾਬ ਤੇ ਅਹਿਮਦਨਗਰ ਆਦਿ ਸ਼ਾਮਲ ਹਨ। ਹਫਤਾਵਾਰੀ ਰਾਸ਼ਟਰੀ ਔਸਤ ਪਾਜ਼ੇਟੀਵਿਟੀ ਰੇਟ 5.65 ਫੀਸਦ ਹੈ।
ਮਹਾਰਾਸ਼ਰ ਦਾ ਹਫਤਾਵਾਰੀ ਔਸਤ 23 ਫੀਸਦ ਹੈ, ਪੰਜਾਬ ਦਾ 8.82 ਫੀਸਦ, ਛੱਤੀਸਗੜ੍ਹ ਦਾ 8 ਫੀਸਦ, ਮੱਧ ਪ੍ਰਦੇਸ਼ ਦਾ 7.82 ਫੀਸਦੀ, ਤਾਮਿਲਨਾਡੂ ਦਾ 2.50 ਫੀਸਦ, ਕਰਨਾਟਕ ਦਾ 2.45 ਫੀਸਦ, ਗੁਜਰਾਤ ਦਾ 2.2 ਫੀਸਦ ਤੇ ਦਿੱਲੀ ਦਾ 2.04 ਫੀਸਦ ਹੈ।
ਦੇਸ਼ ਵਿਚ ਮੌਜੂਦਾ ਸਮੇਂ ਕੋਰੋਨਾ ਦੀ ਸਥਿਤੀ ਸਬੰਧੀ ਨੀਤੀ ਆਯੋਗ ਦੇ ਮੈਂਬਰ (ਸਿਹਤ) ਡਾ. ਵੀ.ਕੇ ਪਾਲ ਨੇ ਕਿਹਾ ਕਿ ਅਸੀਂ ਕੁਝ ਜ਼ਿਲ੍ਹਿਆਂ ਵਿਚ ਤੇਜ਼ੀ ਨਾਲ ਗੰਭੀਰ ਸਥਿਤੀ ਦਾ ਸਾਹਮਣਾ ਕਰ ਰਹੇ ਹਾਂ, ਪਰ ਪੂਰਾ ਦੇਸ਼ ਸੰਭਾਵੀ ਰੂਪ ’ਚ ਜ਼ੋਖਮ ਦੀ ਹਾਲਤ ’ਚ ਹੈ। ਵਾਇਰਸ ਨੂੰ ਰੋਕਣ ਤੇ ਜੀਵਨ ਬਚਾਉਣ ਦੇ ਸਾਰੇ ਯਤਨ ਕੀਤੇ ਜਾਣੇ ਚਾਹੀਦੇ ਹਨ। ਉਨ੍ਹਾਂ ਕਿਹਾ ਕਿ ਹਸਪਤਾਲ ਅਤੇ ਆਈਸੀਯੂ ਦੀਆਂ ਤਿਆਰੀਆਂ ਨੂੰ ਮੁੜ ਤਿਆਰ ਕਰਨਾ ਹੋਵੇਗਾ।