ਨਵੀਂ ਦਿੱਲੀ: ਦੇਸ਼ ਦੀ ਰਾਜਧਾਨੀ ਦਿੱਲੀ ਵਿੱਚ ਸਕੂਲ ਅਜੇ ਨਹੀਂ ਖੁੱਲ੍ਹਣਗੇ । ਦਿੱਲੀ ਸਰਕਾਰ ਦੇ ਪਿਛਲੇ ਹੁਕਮ ਵਿਚ 31 ਅਕਤੂਬਰ 2020 ਤੱਕ ਸਕੂਲ ਬੰਦ ਰੱਖਣ ਦੇ ਆਦੇਸ਼ ਜਾਰੀ ਕੀਤੇ ਸਨ ।
ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੇ ਬੁੱਧਵਾਰ ਨੂੰ ਕਿਹਾ ਕਿ ਦਿੱਲੀ ਵਿਚ ਕੋਰੋਨਾ ਦੀ ਵਜ੍ਹਾ ਕਰਕੇ ਅਗਲੇ ਆਦੇਸ਼ ਤੱਕ ਬੰਦ ਰਹਿਣਗੇ ।
ਉਨ੍ਹਾਂ ਕਿਹਾ ਕਿ ਆਨਲਾਈਨ ਪੜ੍ਹਾਈ ਜਾਰੀ ਰਹੇਗੀ । ਸਿਸੋਦੀਆ ਨੇ ਕਿਹਾ ਕਿ ਮਾਪਿਆਂ ਅਤੇ ਬੱਚਿਆਂ ਨੂੰ ਡਰ ਹੈ ਕਿ ਸਕੂਲ ਖੁੱਲ੍ਹੇ ਤਾਂ ਵਾਇਰਸ ਦਾ ਖ਼ਤਰਾ ਵਧ ਜਾਵੇਗਾ । ਉਨ੍ਹਾਂ ਕਿਹਾ ਕਿ ਇਸ ਲਈ ਦਿੱਲੀ ਦੇ ਸਾਰੇ ਸਰਕਾਰੀ ਅਤੇ ਪ੍ਰਾਈਵੇਟ ਸਕੂਲ ਅਗਲੇ ਆਦੇਸ਼ ਤੱਕ ਬੰਦ ਰਹਿਣਗੇ । ਇਸ ਬਾਰੇ ਜਦੋਂ ਵੀ ਫ਼ੈਸਲਾ ਕੀਤਾ ਜਾਵੇ, ਸੂਚਿਤ ਕੀਤਾ ਜਾਵੇਗਾ ।
ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਦੁਨੀਆ ਭਰ ਵਿਚ ਜਿੱਥੇ ਵੀ ਮਹਾਮਾਰੀ ਦਰਮਿਆਨ ਸਕੂਲ ਖੋਲ੍ਹੇ ਗਏ, ਉੱਥੇ ਬੱਚਿਆਂ 'ਚ ਕੇਸ ਵਧ ਗਏ । ਅਜਿਹੇ ਵਿਚ ਦਿੱਲੀ 'ਚ ਸਕੂਲ ਖੋਲ੍ਹਣਾ ਠੀਕ ਨਹੀਂ ਹੋਵੇਗਾ ।
ਦੱਸਣਾ ਬਣਦਾ ਹੈ ਕਿ ਦਿੱਲੀ-ਐਨਸੀਆਰ 'ਤੇ ਕੋਰੋਨਾ ਦੇ ਨਾਲ-ਨਾਲ ਜ਼ਹਿਰੀਲੀ ਹਵਾ ਦੀ ਦੋਹਰੀ ਮਾਰ ਹੈ । ਪਿਛਲੇ ਕੁਝ ਹਫ਼ਤਿਆਂ ਤੋਂ ਦਿੱਲੀ ਵਿਚ ਹਵਾ ਖਰਾਬ ਸ਼੍ਰੇਣੀ ਵਿਚ ਬਣੀ ਹੋਈ ਹੈ । ਖਰਾਬ ਹਵਾ ਵਿਚ ਸਾਹ ਲੈਂਦੇ-ਲੈਂਦੇ ਹੁਣ ਲੋਕਾਂ ਦੀ ਸਿਹਤ 'ਤੇ ਉਸ ਦਾ ਅਸਰ ਸਾਫ਼ ਨਜ਼ਰ ਆਉਣ ਲੱਗਾ ਹੈ । ਲੋਕਾਂ ਵਿਚ ਸਿਰ ਦਰਦ, ਅੱਖਾਂ 'ਚ ਜਲਣ ਵਰਗੀਆਂ ਸ਼ਿਕਾਇਤਾਂ ਵੱਧ ਰਹੀਆਂ ਹਨ । ਇਸ ਦੇ ਨਾਲ ਹੀ ਕੋਰੋਨਾ ਦੇ ਕੇਸਾਂ ਵਿਚ ਵੀ ਉਛਾਲ ਆਇਆ ਹੈ ।