ਨਵੀਂ ਦਿੱਲੀ: ਸਾਊਣੀ ਦੀਆਂ ਫਸਲਾਂ ਦੀ ਬੀਜਾਈ ਤੋਂ ਪਹਿਲਾਂ ਨਰਿੰਦਰ ਮੋਦੀ ਦੀ ਅਗਵਾਈ ਵਾਲੀ ਕੇਂਦਰ ਸਰਕਾਰ ਵੱਲੋਂ ਖਾਦ ਬਣਾਉਣ ਵਾਲੀਆਂ ਕੰਪਨੀਆਂ ਨੂੰ ਖਾਦਾਂ ਦੀਆਂ ਕੀਮਤਾਂ ਵਿੱਚ ਵਾਧਾ ਕਰਨ ਦੀ ਛੋਟ ਦੇਣਾ ਕਿਸਾਨੀ ਨਾਲ ਇੱਕ ਹੋਰ ਵੱਡਾ ਧੱਕਾ ਹੈ।ਇਹ ਬਿਆਨ ਕੁੱਲ ਹਿੰਦ ਕਿਸਾਨ ਸਭਾ (ਏਆਈਕੇਐਸ) ਦੇ ਜਨਰਲ ਸਕੱਤਰ ਹਨਨ ਮੁੱਲ੍ਹਾ ਤੇ ਕੌਮੀ ਪ੍ਰਧਾਨ ਅਸ਼ੋਕ ਧਾਵਲੇ ਨੇ ਸਾਂਝੇ ਤੌਰ ਉਤੇ ਜਾਰੀ ਕੀਤਾ ਹੈ।
ਦੋਹਾਂ ਆਗੂਆਂ ਵੱਲੋਂ ਬਿਆਨ ਵਿੱਚ ਕਿਹਾ ਗਿਆ ਕਿ ਇਸ ਵਾਧੇ ਉਪਰੰਤ, ਇਨ੍ਹਾਂ ਕੰਪਨੀਆਂ ਵੱਲੋਂ ਡੀਏਪੀ (ਡਾਈ) ਦੀ ਕੀਮਤ ਵਿੱਚ 58 ਫੀਸਦੀ ਵਾਧਾ ਕਰਨ ਨਾਲ ਇਸ ਖਾਦ ਦੀ ਬੋਰੀ ਦੀ ਕੀਮਤ 1200 ਰੁਪਏ ਤੋਂ ਵਧਾ ਕੇ 1900 ਰੁਪਏ ਕਰ ਦਿੱਤੀ ਗਈ ਹੈ । ਰਿਪੋਰਟਾਂ ਮੁਤਾਬਕ ਨਾਈਟਰੋਜਨ ਫਾਸਫੋਰਸ ਪੋਟਾਸ਼ੀਅਮ (ਐਨਪੀਕੇ) ਦੀ ਕੀਮਤ 52 ਫੀਸਦੀ ਵਧਾਈ ਗਈ ਹੈ ।
ਪਹਿਲਾਂ ਇਸ ਦੀ ਕੀਮਤ 1175 ਰੁਪਏ ਸੀ ਜੋ ਹੁਣ 1790 ਰੁਪਏ ਹੋ ਗਈ ਹੈ । ਇਸ ਤਰ੍ਹਾਂ ਇਸ ਖਾਦ ਵਿੱਚ 615ਰੁਪਏ ਪ੍ਰਤੀ ਬੋਰੀ ਦਾ ਵਾਧਾ ਹੋਇਆ ਹੈ ।
ਪੋਟਾਸ਼ ਦੀ ਕੀਮਤ ਵਿੱਚ ਦੁੱਗਣੇ ਤੋਂ ਵੀ ਵਧ ਦਾ ਵਾਧਾ ਹੋਇਆ ਹੈ।ਪਹਿਲਾਂ ਇਸ ਖਾਦ ਦੀ ਕੀਮਤ 850ਰੁਪਏ ਸੀ ਜੋ ਕਿ 875 ਰੁਪਏ ਵੱਧ ਕੇ 1725 ਰੁਪਏ ਹੋ ਗਈ ਹੈ । ਇਸੇ ਤਰ੍ਹਾਂ ਅਮੋਨੀਅਮ ਫਾਸਫੋਰਸ ਸਲਫੇਟ (ਏਪੀਐਸ) ਦੀ ਕੀਮਤ 925 ਰੁਪਏ ਤੋਂ ਵਧਾ ਕੇ 1350 ਰੁਪਏ ਕਰ ਦਿੱਤੀ ਗਈ ਹੈ ਜੋ ਕਿ ਖਾਦ ਦੀ ਕੀਮਤ ਵਿੱਚ 46 ਫੀਸਦੀ ਵਾਧਾ ਹੈ।ਕਿਸਾਨ ਸਭਾ ਦੇ ਆਗੂਆਂ ਨੇ ਕਿਹਾ ਕਿ ਇੱਕ ਪਾਸੇ ਡੀਜਲ ਦੀਆਂ ਕੀਮਤਾਂ ਨੇ ਪਹਿਲਾਂ ਹੀ ਕਿਸਾਨੀ ਦਾ ਲੱਕ ਤੋੜਿਆ ਹੋਇਆ ਹੈ, ਦੂਜੇ ਪਾਸੇ ਖਾਦ ਦੀ ਕੀਮਤਾਂ ਵਿੱਚ ਵਾਧਾ ਹੋਰ ਚਿੰਤਾਜਨਕ ਹੈ । ਇਸ ਦੇ ਨਾਲ ਹੀ ਕੇਂਦਰ ਸਰਕਾਰ ਕਿਸਾਨਾਂ ਦੀ ਫਸਲਾਂ ਦੀ ਕੀਮਤ ਸੀ-2 ਪਲੱਸ 50 ਫੀਸਦੀ ਮੁਤਾਬਿਕ ਤੈਅ ਕਰਨ ਤੋਂ ਭੱਜ ਗਈ ਹੈ ।
ਕਿਸਾਨ ਸਭਾ ਦੇ ਆਗੂਆਂ ਨੇ ਕਿਹਾ ਕਿ ਕੇਂਦਰ ਵੱਲੋਂ ਕਿਸਾਨਾਂ ਨੂੰ ਪ੍ਰਤੀ ਤਿਮਾਹੀ 2000 ਰੁਪਏ ਦੇ ਕੇ ਜੋ ਕਿਸਾਨ ਹਮਾਇਤੀ ਹੋਣ ਦੇ ਦਾਅਵੇ ਕੀਤੇ ਜਾ ਰਹੇ ਹਨ, ਉਹ ਸੱਚਾਈ ਤੋਂ ਕੋਹਾਂ ਦੂਰ ਹਨ । ਜੇ ਵੇਖਿਆ ਜਾਵੇ ਤਾਂ ਛੋਟੇ ਤੋਂ ਛੋਟਾ ਕਿਸਾਨ ਵੀ ਜੇਕਰ ਇਕੱਲਾ ਚਾਰ ਥੈਲੇ ਡਾਈ ਖਾਦ ਵਰਤੇ ਤਾਂ ਉਸ ਨੂੰ 2800ਰੁਪਏ ਦਾ ਵਾਧੂ ਖਰਚਾ ਕਰਨਾ ਪਵੇਗਾ । ਖਾਦ ਕੀਮਤਾਂ ਵਿੱਚ ਇਹ ਸਭ ਵਾਧਾ ਉਸ ਸਮੇਂ ਕੀਤਾ ਗਿਆ ਹੈ ਜਦੋਂ ਸਾਊਣੀ ਦੀ ਬਿਜਾਈ ਦਾ ਸਮਾਂ ਬਿਲਕੁਲ ਨੇੜੇ ਹੈ।ਦੋਹਾਂ ਆਗੂਆਂ ਨੇ ਕਿਹਾ ਕਿ ਇੱਕ ਪਾਸੇ ਕੇਂਦਰ ਸਰਕਾਰ ਕਿਸਾਨਾਂ ਨੂੰ ਇੱਕ ਹੱਥ 2000 ਰੁਪਏ ਦੇਣ ਦੇ ਦਮਗਜੇ ਮਾਰ ਰਹੀ ਹੈ, ਜਦਕਿ ਦੂਜੇ ਬੰਨੇ ਉਹ ਕਾਰਪੋਰੇਟ ਘਰਾਣਿਆਂ ਨੂੰ ਕਿਸਾਨਾਂ ਨੂੰ ਲੁੱਟਣ ਦੀ ਖੁੱਲ੍ਹ ਦੇ ਰਹੀ ਹੈ ।
ਕਿਸਾਨ ਸਭਾ ਦੇ ਆਗੂਆਂ ਨੇ ਮੰਗ ਕੀਤੀ ਕਿ ਖਾਦ ਕੀਮਤਾਂ ਵਿੱਚ ਕੀਤਾ ਗਿਆ ਬੇਲੋੜਾ ਵਾਧਾ ਤੁਰੰਤ ਵਾਪਸ ਲੈ ਕੇ ਕਿਸਾਨਾਂ ਨੂੰ ਰਾਹਤ ਦਿੱਤੀ ਜਾਵੇ । ਇਸ ਦੇ ਨਾਲ ਹੀ ਉਨ੍ਹਾਂ ਕਿਸਾਨ ਸਭਾ ਦੀਆਂ ਸੂਬਾਈ ਇਕਾਈਆਂ ਨੂੰ ਸੱਦਾ ਦਿੱਤਾ ਕਿ ਉਹ ਕਰੋਨਾਵਾਇਰਸ ਦੀ ਬਿਮਾਰੀ ਨੂੰ ਧਿਆਨ ਵਿੱਚ ਰੱਖਦਿਆਂ ਕਿਸਾਨੀ ਦੇ ਹੱਕ ਵਿੱਚ ਆਵਾਜ਼ ਬੁਲੰਦ ਕਰਨ ।