ਝੱਜਰ: ਦੋ ਦਿਨ ਪਹਿਲਾ ਲਾਪਤਾ ਹੋਈ ਝੱਜਰ ਦੇ ਛਾਰਾ ਪਿੰਡ ਦੀ ਰਹਿਣ ਵਾਲੀ ਅੰਤਰਰਾਸ਼ਟਰੀ ਮੁੱਕੇਬਾਜ਼ ਮਾਨਸੀ ਦਲਾਲ ਸ਼ਨੀਵਾਰ ਨੂੰ ਮਿਲ ਗਈ | ਪੁਲਿਸ ਨੇ ਉਸਨੂੰ ਲੱਭ ਲਿਆ ਹੈ। ਮਾਨਸੀ ਵੀਰਵਾਰ ਨੂੰ ਕਸਰਤ ਕਰਨ ਵਾਸਤੇ ਨਿਕਲੀ ਸੀ ਪਰ ਵਾਪਸ ਨਹੀਂ ਪਰਤੀ | ਸੂਤਰਾਂ ਦਾ ਕਹਿਣਾ ਹੈ ਕਿ ਪੁਲਿਸ ਨੇ ਤਿੰਨ ਮੁਲਜ਼ਮਾਂ ਨੂੰ ਵੀ ਗਿਰਫ਼ਤਾਰ ਕੀਤਾ ਹੈ | ਇਸਦਾ ਜਲਦ ਹੀ ਖ਼ੁਲਾਸਾ ਹੋਵੇਗਾ | ਫਿਲਹਾਲ ਪੁਲਿਸ ਪਹਿਲਾਂ ਮਾਨਸੀ ਦਾ ਮੈਡੀਕਲ ਕਰਵਾਏਗੀ, ਇਸ ਤੋਂ ਬਾਅਦ ਸਾਰੀ ਘਟਨਾ ਦੀ ਜਾਣਕਾਰੀ ਦਿੱਤੀ ਜਾਵੇਗੀ।
17 ਸਾਲਾਂ ਦੀ ਮਾਨਸੀ ਰੋਜ਼ ਦੀ ਤਰ੍ਹਾਂ ਵੀਰਵਾਰ ਨੂੰ ਵੀ ਦੌੜ ਲਾਉਣ ਲਈ ਸਿਕੰਦਰਪੁਰ ਮਾਰਗ ਤੇ ਨਿਕਲੀ ਸੀ | ਪਰ ਕਈ ਘੰਟਿਆਂ ਬਾਅਦ ਵੀ ਵਾਪਸ ਨਹੀਂ ਪਰਤੀ। ਮਾਨਸੀ ਦੇ ਪਿਤਾ ਅੰਜੀਤ ਦਲਾਲ ਨੇ ਦੱਸਿਆ ਕਿ ਮਾਨਸੀ ਵੀਰਵਾਰ ਸ਼ਾਮ 5:30 ਵਜੇ ਬਾਦਲੀ ਰੋਡ ਸਥਿਤ ਢਾਬੇ ਦੇ ਅੱਗੇ ਹੀ ਸਿਕੰਦਰਪੁਰ ਮੋੜ ਤੇ ਦੌੜਨ ਲਈ ਰਵਾਨਾ ਹੋਈ ਸੀ, ਉਸ ਕੋਲ ਮੋਬਾਈਲ ਨਹੀਂ ਸੀ ਅਤੇ ਨਾ ਹੀ ਕਦੇ ਉਹ ਮੋਬਾਈਲ ਰੱਖਦੀ ਸੀ | 15-20 ਮਿੰਟਾਂ ਵਿਚ ਉਹ ਦੌੜ ਲਗਾ ਕੇ ਵਾਪਸ ਆ ਜਾਂਦੀ ਸੀ ਪਰ ਅਜੇ ਤੱਕ ਉਸਦਾ ਪਤਾ ਨਹੀਂ ਚੱਲ ਸੱਕਿਆ ਹੈ | ਉਹ ਸਿਰਫ ਆਪਣੀ ਪ੍ਰੈਕਟਿਸ 'ਚ ਲੱਗੀ ਹੋਈ ਸੀ ਉਸਨੂੰ ਖੇਲੋ ਇੰਡੀਆ ਕੈਂਪ ਅਤੇ ਇੰਡੀਆ ਕੈਂਪ ਲਈ ਜਲਦੀ ਹੀ ਭੋਪਾਲ ਵੀ ਰਵਾਨਾ ਹੋਣਾ ਸੀ |
ਪਰਿਵਾਰਕ ਮੈਂਬਰਾਂ ਦੀ ਸ਼ਿਕਾਇਤ ‘ਤੇ ਵੀਰਵਾਰ ਤੋਂ ਹੀ ਪੁਲਿਸ ਵੀ ਐਕਟਿਵ ਸੀ | ਪੁਲਿਸ ਨੇ ਹੁਣ ਮਾਨਸੀ ਨੂੰ ਬਰਾਮਦ ਕਰ ਲਿਆ ਹੈ। ਉਸਦਾ ਮੈਡੀਕਲ ਕਰਵਾਇਆ ਜਾ ਰਿਹਾ ਹੈ | ਪੁਲਿਸ ਜਲਦੀ ਹੀ ਇਸ ਮਾਮਲੇ ਦਾ ਖ਼ੁਲਾਸਾ ਕਰੇਗੀ।