ਸਿਰਸਾ:ਤਿੰਨ ਖੇਤੀ ਕਾਨੂੰਨਾਂ ਦੇ ਵਿਰੋਧ ਵਿੱਚ 21 ਦਿਨਾਂ ਤੋਂ ਪੱਕਾ ਮੋਰਚੇ ਅਤੇ ਧਰਨਾਂ ਦੇ ਰਹੇ ਕਿਸਾਨਾਂ ਨੇ ਬਾਬਾ ਭੂਮਣਸ਼ਾਹ ਚੌਕ ਤੇ ਭਾਜਪਾ ਦੇ ਰਾਸ਼ਟਰੀ ਪ੍ਰਧਾਨ, ਕੇਂਦਰੀ ਖੇਤੀ ਮੰਤਰੀ, ਸੀ ਐਮ ਅਤੇ ਡਿਪਟੀ ਸੀਐਮ ਅਤੇ ਬਿਜਲੀ ਮੰਤਰੀ ਦੇ ਪੁਤਲੇ ਫੂਕੇ। ਪੁਤਲਾ ਫੂਕ ਕੇਵਲ ਸਿਰਸਾ ਹੀ ਨਹੀ ਸਗੋਂ ਜ਼ਿਲ੍ਹੇ ਦੇ ਕਈ ਪਿੰਡਾਂ ਵਿੱਚ ਪੀਐਮ ਅਤੇ ਸੀਐਮ ਸਮੇਤ ਕਾਰਪੋਨੇਟ ਘਰਾਰਣਿਆਂ ਦੇ ਪੁਤਲੇ ਫੂਕੇ ਗਏ। ਕਿਸਾਨਾਂ ਨੇ ਕਈ ਪਿੰਡਾਂ ਵਿੱਚ ਡਿਪਟੀ ਸੀਐਮ ਦਾ ਪਰੋਗਰਾਮ ਵੀ ਮੁਲਤਵੀ ਕਰਵਾ ਦਿੱਤਾ। ਅੱਜ ਸਿਰਸਾ ਦੇ ਸ਼ਹੀਦ ਭਗਤ ਸਿੰਘ ਸਟੇਡੀਅਮ ਵਿਚ ਬੋਲਦੇ ਹੋਏ ਕਿਸਾਨ ਨੇਤਾ ਪ੍ਰਹਲਾਦ ਸਿੰਘ ਭਾਰੂਖੇੜਾ ਨੇ ਕਿਹਾ ਕਿ ਹਰ ਵਾਰ ਦਸ਼ਹਰੇ ਉੱਤੇ ਲੋਕ ਰਾਵਣ ਦੇ ਪੁਤਲੇ ਫੁਕਦੇ ਹਨ ਪਰ ਦੇਸ਼ ਦੇ ਅਨੇਕ ਰਾਵਣ ਇਸ ਸਮੇਂ ਦੇਸ਼ ਦੀ ਜਨਤਾ ਨੂੰ ਖਾ ਰਹੇ ਹਨ। ਭਾਰੂਖੇੜਾ ਨੇ ਕਿਹਾ ਕਿ ਦੇਸ਼ ਦੇ ਇਹ ਰਾਵਣ ਦੇਸ਼ ਨੂੰ ਹੀ ਵੇਚਣ ਉੱਤੇ ਆਮਾਦਾ ਹਨ। ਇਸ ਮੌਕੇ ਜੂਝਾਰੂ ਅਧਿਆਪਕ ਨੇਤਾ ਬਿਕਰਜੀਤ ਸਿੰਘ ਸਾਧੂਵਾਲਾ ਨੇ ਮੋਦੀ ਸਰਕਾਰ ਦੀ ਪੋਲ ਖੋਹਲਦੇ ਹੋਏ ਕਿਹਾ ਕਿ ਆਪਣੇ ਚਹੇਤੇ ਪੂੰਜੀਪਤੀਆਂ ਨੂੰ ਮੁਨਾਫ਼ਾ ਦੇਣ ਲਈ ਮੇਹਨਤਕਸ਼ ਵਰਗ ਨੂੰ ਮੋਦੀ ਅਤੇ ਇਸਦੀ ਕਾਰਪੋਰੇਟ ਜੁੰਡਲੀ ਨੇ ਕਿਤੇ ਦਾ ਵੀ ਨਹੀਂ ਛੱਡਿਆ ਜਿਸ ਕਾਰਨ ਦੇਸ਼ ਦਾ ਕਿਸਾਨ ਸੜਕਾਂ ਤੇ ਹੈ। ਇਸ ਮੌਕੇ ਕਾਲਾਂਵਾਲੀ ਦੇ ਕਿਸਾਨ ਨੇਤਾ ਗੁਰਦਾਸ ਸਿੰਘ ਲੱਕੜਵਾਲੀ ਨੇ ਕਿਹਾ ਕਿ ਕਿਸਾਨਾਂ ਨੂੰ ਆਪਣੀ ਫਸਲ ਵੇਚਣ ਲਈ ਹੁਣ ਉਦਯੋਗਕ ਘਰਾਣਿਆਂ ਦੇ ਹੱਥਾਂ ਦੀ ਕਠਪੁਤਲੀ ਬਨਣਾ ਪਵੇਗਾ। ਕਿਉਂਕਿ ਉਦਯੋਗਿਕ ਘਰਾਣੇ ਮਨਮਰਜ਼ੀ ਨਾਲ ਕਿਸਾਨਾਂ ਦੀ ਫਸਲ ਖਰੀਦਣਗੇ ਅਤੇ ਫਿਰ ਉਸਦਾ ਸਟਾਕ ਕਰਕੇ ਕਾਲਾਬਾਜ਼ਾਰੀ ਕਰਨਗੇ। ਇਸ ਮੌਕੇ ਖੱਬੇ ਪੱਖੀ ਨੇਤਾ ਸਵਰਨ ਸਿੰਘ ਵਿਰਕ ਨੇ ਕਿਹਾ ਕਿ ਸਿਰਸਾ ਤੋ ਸ਼ੁਰੂ ਹੋਇਆ ਅੰਦੋਲਨ ਹੁਣ ਪੂਰੇ ਪ੍ਰਦੇਸ਼ ਵਿੱਚ ਫੈਲ ਚੁੱਕਿਆ ਹੈ। ਇਸ ਧਰਨੇ ਵਿੱਚ ਪਿੰਡ ਤਾਰੂਆਣਾ ਦੇ ਸਾਬਕਾ ਸਰਪੰਚ ਹਰਜਿੰਦਰ ਸਿੰਘ ਲੀਲਾ, ਮਲਕੀਅਤ ਸਿੰਘ ਸਿੰਘਪੁਰਾ, ਜੋਗਿੰਦਰ ਸਿੰਘ ਲੱਕੜਵਾਲੀ, ਇਕਬਾਲ ਸਿੰਘ ਤਿਲੋਕੇਵਾਲਾ ਅਤੇ ਜਗਜੀਤ ਸਿੰਘ ਕਾਲਾਂਵਾਲੀ ਸਮੇਤ ਕਿਸਾਨਾਂ ਨੇ ਸਰਕਾਰ ਖਿਲਾਫ ਜ਼ੋਰਦਾਰ ਨਾਅਰੇਬਾਜ਼ੀ ਕੀਤੀ। ਇਸ ਧਰਨੇ ਵਿਚ ਮੰਡੀ ਕਾਲਾਂਵਾਲੀ ਦੇ ਧਰਨਾਰਤ ਕਿਸਾਨਾਂ ਦੇ ਨਾਲ ਹੀ ਪਿੰਡ ਗੋਬਿੰਦਪੁਰਾ ਦੇ 11 ਕਿਸਾਨ ਗੁਰਦਿਆਲ ਸਿੰਘ ਅਤੇ ਮਨਪ੍ਰੀਤ ਸਿੰਘ ਅਤੇ ਲਵਪ੍ਰੀਤ ਸਿੰਘ ਦੀ ਅਗਵਾਈ 'ਚ ਦਿਨ ਰਾਤ ਦੇ ਧਰਨੇ ਤੇ ਡਟੇ ਰਹੇ।