ਮੈਲਬੌਰਨ: ਬੀਤੇ ਬੁੱਧਵਾਰ ਨੂੰ ਮੈਲਬੌਰਨ ਦੇ ਪੁਆਇੰਟ ਕੁੱਕ ਇਲਾਕੇ ਵਿੱਚ ਇੱਕ ਘਰ ਨੂੰ ਅੱਗ ਲੱਗਣ ਕਾਰਨ ਇੱਕ 28 ਸਾਲਾ ਪੰਜਾਬੀ ਨੌਜਵਾਨ ਇੰਦਰਪਾਲ ਸਿੰਘ ਸੋਹਲ, ਉਸ ਦੀ 19 ਸਾਲਾ ਆਸਟਰੇਲੀਅਨ ਪਤਨੀ ਐਬੀ ਫੋਰੈਸਟ ਅਤੇ ਤਿੰਨ ਹਫ਼ਤਿਆਂ ਦੀ ਧੀ ਆਇਵੀ ਦੀ ਦਰਦਨਾਕ ਮੌਤ ਹੋ ਗਈ । ਘਰ ਨੂੰ ਅੱਗ ਲਾਉਣ ਦੇ ਇਲਜ਼ਾਮ ਵਿੱਚ ਪੁਲਸ ਨੇ ਇੱਕ 46 ਸਾਲਾ ਔਰਤ ਜੇਨੀ ਹੇਜ ਨੂੰ ਏਅਰਪੋਰਟ ਵੈੱਸਟ ਇਲਾਕੇ ਚੋਂ ਗ੍ਰਿਫ਼ਤਾਰ ਕੀਤਾ ਹੈ ਜਿਸ ਤੇ ਤਿੰਨ ਕਤਲ ਕਰਨ ਅਤੇ ਘਰ ਨੂੰ ਅੱਗ ਲਾਉਣ ਦੇ ਦੋਸ਼ ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ ।
ਇੱਕੋ ਪਰਿਵਾਰ ਦੇ ਤਿੰਨ ਜੀਆਂ ਦੀ ਜਾਨ ਲੈਣ ਵਾਲੀ ਉਕਤ ਔਰਤ ਸੈਕਸ ਵਰਕਰ ਦੱਸੀ ਜਾ ਰਹੀ ਹੈ ਅਤੇ ਉਸੇ ਮਕਾਨ ਵਿੱਚ ਹੇਠਲੀ ਮੰਜ਼ਲ 'ਚ ਕਮਰਾ ਕਿਰਾਏ ਤੇ ਲੈ ਕੇ ਰਹਿ ਰਹੀ ਸੀ। ਫ਼ਿਲਹਾਲ ਪੁਲਸ ਘਟਨਾ ਦੀ ਜਾਂਚ ਕਰ ਰਹੀ ਹੈ ਤੇ ਹਾਲੇ ਤੱਕ ਪੁਲਸ ਵੱਲੋਂ ਇਹ ਜਾਣਕਾਰੀ ਜਨਤਕ ਨਹੀਂ ਕੀਤੀ ਗਈ ਕਿ ਉਕਤ ਔਰਤ ਨੇ ਅਜਿਹਾ ਕਿਉਂ ਕੀਤਾ । ਪਰ ਘਟਨਾ ਤੋਂ ਪਹਿਲਾਂ ਉਕਤ ਔਰਤ ਦੀ ਕਿਸੇ ਗ੍ਰਾਹਕ ਨੂੰ ਲੈ ਕੇ ਤੂੰ ਤੂੰ ਮੈਂ ਮੈਂ ਹੋਈ ਸੀ । ਘਟਨਾ ਸਮੇਂ ਗੁਆਂਢੀਆਂ ਵੱਲੋਂ ਅੱਗ ਦੀਆਂ ਲਪਟਾਂ ਵਿੱਚ ਘਿਰੇ ਪਰਿਵਾਰ ਨੂੰ ਬਚਾਉਣ ਦੀ ਕੋਸ਼ਿਸ਼ ਵੀ ਕੀਤੀ ਗਈ ਜੋ ਕਿ ਅਸਫਲ ਰਹੀ ।