ਮੁੰਬਈ: ਬਾਲੀਵੁੱਡ ਦੀਆਂ ਪ੍ਰਸਿੱਧ ਗਾਇਕਾਵਾਂ ਵਿੱਚੋਂ ਇੱਕ, ਆਸ਼ਾ ਭੋਂਸਲੇ ਦਾ ਦੇਹਾਂਤ ਹੋ ਗਿਆ ਹੈ। ਉਨ੍ਹਾਂ ਨੇ ਐਤਵਾਰ ਦੁਪਹਿਰ ਨੂੰ ਮੁੰਬਈ ਦੇ ਬ੍ਰੀਚ ਕੈਂਡੀ ਹਸਪਤਾਲ ਵਿੱਚ ਆਪਣੇ ਆਖਰੀ ਸਾਹ ਲਏ। ਉਨ੍ਹਾਂ ਨੂੰ ਸ਼ਨੀਵਾਰ ਸ਼ਾਮ ਨੂੰ ਉੱਥੇ ਦਾਖਲ ਕਰਵਾਇਆ ਗਿਆ ਸੀ। ਉਹ 92 ਸਾਲ ਦੇ ਸਨ। ਹਸਪਤਾਲ 'ਚ ਦਾਖਲ ਕਰਵਾਉਣ ਤੋਂ ਬਾਅਦ ਗਾਇਕਾ ਦੀ ਪੋਤੀ ਨੇ ਦੱਸਿਆ ਸੀ ਕਿ ਛਾਤੀ ਵਿੱਚ ਇਨਫੈਕਸ਼ਨ ਅਤੇ ਥਕਾਵਟ ਕਾਰਨ ਉਨ੍ਹਾਂ ਦੀ ਸਿਹਤ ਵਿਗੜ ਗਈ ਸੀ। ਹਾਲਾਂਕਿ, ਹੁਣ ਖ਼ਬਰ ਆਈ ਹੈ ਕਿ ਆਸ਼ਾ ਭੋਂਸਲੇ ਦਾ ਦੇਹਾਂਤ ਹੋ ਗਿਆ ਹੈ।
ਆਸ਼ਾ ਭੋਂਸਲੇ ਨੇ ਆਪਣਾ ਕਰੀਅਰ 1940 ਦੇ ਦਹਾਕੇ ਵਿੱਚ ਸ਼ੁਰੂ ਕੀਤਾ ਸੀ। ਆਸ਼ਾ ਭੋਂਸਲੇ ਨੇ ਆਪਣੇ ਕਰੀਅਰ ਵਿੱਚ 12, 000 ਤੋਂ ਵੱਧ ਗੀਤ ਗਾਏ ਹਨ। ਉਸਦੇ “ਦਮ ਮਾਰੋ ਦਮ, ” “ਪਿਆ ਤੂ ਅਬ ਤੋ ਆਜਾ, ” ਅਤੇ “ਚੂਰਾ ਲਿਆ ਹੈ ਤੁਮਨੇ” ਵਰਗੇ ਗੀਤ ਸਦਾਬਹਾਰ ਹਨ। ਆਸ਼ਾ ਭੋਂਸਲੇ ਦਾ ਸੰਗੀਤਕ ਸਫ਼ਰ ਆਸਾਨ ਨਹੀਂ ਸੀ। ਆਸ਼ਾ ਭੋਂਸਲੇ ਪ੍ਰਸਿੱਧ ਥੀਏਟਰ ਅਦਾਕਾਰ ਅਤੇ ਕਲਾਸੀਕਲ ਗਾਇਕ ਦੀਨਾਨਾਥ ਮੰਗੇਸ਼ਕਰ ਦੀ ਧੀ ਹੈ ਅਤੇ ਪ੍ਰਸਿੱਧ ਗਾਇਕਾ ਲਤਾ ਮੰਗੇਸ਼ਕਰ ਦੀ ਛੋਟੀ ਭੈਣ ਹੈ। ਉਨ੍ਹਾਂ ਦੇ ਪਿਤਾ ਦਾ ਦੇਹਾਂਤ ਉਦੋਂ ਹੋਇਆ ਜਦੋਂ ਉਹ ਸਿਰਫ਼ 9 ਸਾਲ ਦੀ ਸੀ, ਜਿਸ ਕਾਰਨ ਉਨ੍ਹਾਂ ਨੇ ਅਤੇ ਉਨ੍ਹਾਂ ਦੀ ਭੈਣ ਲਤਾ ਮੰਗੇਸ਼ਕਰ ਨੇ ਮਿਲ ਕੇ ਪਰਿਵਾਰ ਦਾ ਗੁਜ਼ਾਰਾ ਚਲਾਉਣ ਲਈ ਸਿੰਗਿੰਗ ਸ਼ੁਰੂ ਕਰ ਦਿੱਤੀ ਸੀ।
ਉਨ੍ਹਾਂ ਨੇ ਪ੍ਰਸਿੱਧ ਨਿਰਦੇਸ਼ਕਾਂ ਬਿਮਲ ਰਾਏ ਅਤੇ ਰਾਜ ਕਪੂਰ ਦੇ ਨਾਲ-ਨਾਲ ਪ੍ਰਸਿੱਧ ਸੰਗੀਤਕਾਰ ਓ.ਪੀ. ਨਈਅਰ, ਸਰਦਾਰ ਮਲਿਕ, ਸੱਜਾਦ ਹੁਸੈਨ, ਐਸ. ਮਹਿੰਦਰ ਅਤੇ ਏ.ਆਰ. ਰਹਿਮਾਨ ਨਾਲ ਕੰਮ ਕੀਤਾ। ਉਨ੍ਹਾਂ ਦੀ ਵੱਡੀ ਭੈਣ, ਲਤਾ ਮੰਗੇਸ਼ਕਰ, 1940 ਅਤੇ 1950 ਦੇ ਦਹਾਕੇ ਦੀਆਂ ਮਹਾਨ ਗਾਇਕਾਵਾਂ ਵਿੱਚੋਂ ਇੱਕ ਸੀ।