ਨਵੀਂ ਦਿੱਲੀ: ਕੋਰੋਨਾ ਦੇ ਵਧਦੇ ਮਾਮਲਿਆਂ ਵਿਚਾਲੇ ਚੰਗੀ ਖਬਰ ਸਾਹਮਣੇ ਆ ਰਹੀ ਹੈ। ਦੇਸ਼ ਵਿਚ ਕਦੇ ਵੀ ਮੌਡਰਨਾ ਵੈਕਸੀਨ ਦੀ ਖੁਰਾਕ ਆ ਸਕਦੀ ਹੈ। ਸਰਕਾਰ ਨੇ ਅਮਰੀਕਾ ਨੂੰ ਚਿੱਠੀ ਲਿਖੀ ਹੈ, ਜਿਸ ਦੇ ਜਵਾਬ ਦੀ ਉਡੀਕ ਹੈ।
ਜੇ ਇਸ ਚਿੱਠੀ ਵਿਚ ਮੌਜੂਦ ਨਿਯਮਾਂ ’ਤੇ ਆਪਸੀ ਸਹਿਮਤੀ ਬਣਦੀ ਹੈ ਤਾਂ ਉਸ ਦੇ ਹਫਤੇ ਭਰ ’ਚ ਮੌਡਰਨਾ ਵੈਕਸੀਨ ਦੀ ਪਹਿਲੀ ਖੇਪ ਭਾਰਤ ’ਚ ਆ ਸਕਦੀ ਹੈ। ਟੀਕਾਕਰਨ ਐਂਪਾਵਰਡ ਗਰੁੱਪ ਦੇ ਚੇਅਰਮੈਨ ਡਾ. ਵੀ. ਕੇ. ਪਾਲ ਨੇ ਕਿਹਾ ਕਿ ਮੌਡਰਨਾ ਨੂੰ 2 ਹਫਤੇ ਪਹਿਲਾਂ ਐਮਰਜੈਂਸੀ ਵਰਤੋਂ ਦੀ ਮਨਜ਼ੂਰੀ ਦਿੱਤੀ ਗਈ ਸੀ। ਹੁਣ ਇਹ ਪ੍ਰਕਿਰਿਆ ਵਿਚ ਹੈ। ਅਸਲ ’ਚ ਅਮਰੀਕਾ ਨੇ ਭਾਰਤ ਨੂੰ ਮੋਡਰਨਾ ਦੀਆਂ ਲਗਭਗ 70 ਲੱਖ ਖੁਰਾਕਾਂ ਦੇਣ ਦਾ ਫੈਸਲਾ ਕੀਤਾ ਹੈ। ਕੇਂਦਰ ਸਰਕਾਰ ਨੂੰ ਜਦੋਂ ਇਸ ਦੀ ਜਾਣਕਾਰੀ ਮਿਲੀ ਤਾਂ ਕੰਪਨੀ ਨੂੰ ਅਪਲਾਈ ਕੀਤਾ ਗਿਆ। ਇਸ ਤੋਂ ਤੁਰੰਤ ਬਾਅਦ ਡਰੱਗ ਕੰਟਰੋਲਰ ਜਨਰਲ ਆਫ ਇੰਡੀਆ ਨੇ ਮੌਡਰਨਾ ਵੈਕਸੀਨ ਦੀ ਐਮਰਜੈਂਸੀ ਵਰਤੋਂ ਦੀ ਮਨਜ਼ੂਰੀ ਵੀ ਪ੍ਰਦਾਨ ਕਰ ਦਿੱਤੀ। ਇਸ ਦੇ ਨਾਲ ਹੀ ਮੌਡਰਨਾ ਦੇਸ਼ ਦੀ ਚੌਥੀ ਕੋਵਿਡ ਵੈਕਸੀਨ ਵੀ ਬਣ ਗਈ ਹੈ ਪਰ ਮਨਜੂਰੀ ਦੇਣ ਤੋਂ ਬਾਅਦ ਵੀ ਹੁਣ ਤਕ ਇਸ ਵੈਕਸੀਨ ਦੀ ਇਕ ਵੀ ਖੇਪ ਭਾਰਤ ਨੂੰ ਨਹੀਂ ਮਿਲੀ।