ਮੁੱਲਾਂਪੁਰ ਦਾਖਾ:ਪੰਜਾਬ ਦੀਆਂ ਕਿਸਾਨ ਜੱਥੇਬੰਦੀਆਂ ਦੇ ਸੱਦੇ 'ਤੇ ਕੇਂਦਰ ਦੀ ਨਰਿੰਦਰ ਮੋਦੀ ਸਰਕਾਰ ਵੱਲੋ ਬਣਾਏ ਗਏ ਕਿਸਾਨ ਵਿਰੋਧੀ ਐਕਟ ਖਿਲਾਫ ਕੁੱਲ ਹਿੰਦ ਕਿਸਾਨ ਸਭਾ (ਲੁਧਿਆਣਾ) ਵੱਲੋਂ ਸਥਾਨਕ ਸ਼ਹਿਰ ਦੇ ਮੁੱਖ ਚੌਂਕ ਵਿਖੇ ਦੋ ਘੰਟਿਆਂ ਲਈ ਚੱਕਾ ਜਾਮ ਕਰਕੇ ਰੋਸ ਧਰਨਾ ਦਿੱਤਾ ਗਿਆ । ਇਸ ਧਰਨੇ ਵਿੱਚ ਕਿਸਾਨਾ ਦੇ ਸਮਰਥਨ 'ਚ ਮੰਡੀ ਦੇ ਆੜ੍ਹਤੀ ਐਸੋਸੀਏਸ਼ਨ ਦੇ ਆਗੂ ਅਤੇ ਮੈਂਬਰ ਵੀ ਸ਼ਾਮਲ ਹੋਏ ।
ਵੱਖ- ਵੱਖ ਪਿੰਡਾਂ ਤੋਂ ਪੁੱਜੇ ਕਿਸਾਨਾ ਨੂੰ ਸੰਬੋਧਨ ਕਰਦਿਆਂ ਤਿੰਨ ਨਵੇਂ ਬਣਾਏ ਕਿਸਾਨ ਅਤੇ ਮਜਦੂਰ ਮਾਰੂ ਕਾਨੂੰਨਾ ਦੀ ਜਿੱਥੇ ਨਿਖੇਧੀ ਕੀਤੀ ਗਈ ਉੱਥੇ ਦੇਸ਼ ਦੀ ਐਨ.ਡੀ.ਏ. 2 ਸਰਕਾਰ ਦੇ ਮੁੱਖੀ ਨੂੰ ਸੰਬੋਧਨ ਹੁੰਦਿਆਂ ਸਾਥੀ ਹਰਕੇਸ਼ ਚੌਧਰੀ (ਲੋਕ ਕਲਾ ਮੰਚ), ਸੁਰਿੰਦਰ ਸ਼ਰਮਾ (ਡੀ.ਟੀ.ਐੱਫ. ਆਗੂ), ਕਿਸਾਨ ਆਗੂ ਰੂਪ ਬਸੰਤ ਸਿੰਘ ਬੜੈਚ , ਕੁਲਹਿੰਦ ਕਿਸਾਨ ਸਭਾ ਦੇ ਜ਼ਿਲ੍ਹਾ ਪ੍ਰਧਾਨ ਸਤਿਨਾਮ ਬੜੈਚ, ਕਿਸਾਨ ਆਗੂ ਬਲਦੇਵ ਪਮਾਲ, ਕ੍ਰਿਪਾਲ ਸਿੰਘ ਪਮਾਲੀ, ਮੈਨਜੇਰ ਗੁਰਦੇਵ ਸਿੰਘ, ਪ੍ਰਧਾਨ ਰਜਿੰਦਰ ਸਿੰਘ ਮਾਜਰੀ ਆੜ੍ਹਤੀ ਐਸੋਸੀਏਸ਼ਨ, ਮੁਕੇਸ਼ ਬਾਂਸਲ ਅਤੇ ਜਗਦੀਸ਼ ਪਮਾਲ ਸਰਪੰਚ ਆਦਿ ਨੇ ਕਿਹਾ ਕਿ ਮੋਦੀ ਸਾਹਿਬ! ਜੇਕਰ ਦੇਸ਼ ਅੰਦਰ ਰਾਮਰਾਜ ਹੁੰਦਾ ਤਾਂ ਕਿਸਾਨ ਸੜਕਾਂ 'ਤੇ ਧਰਨਿਆਂ ਲਈ ਮਜਬੂਰ ਨਾ ਹੁੰਦੇ। ਆਗੂਆਂ ਕਿਹਾ ਕਿ ਸੱਤਾ ਪ੍ਰਾਪਤੀ ਲਈ ਚੋਣਾ ਦੌਰਾਨ ਰਾਮਰਾਜ ਦੇਣ ਦਾ ਕੀਤਾ ਵਾਅਦਾ ਸਿਰਫ ਲੋਕਾਂ ਨੂੰ ਭਰਮਾਉਣ ਲਈ ਹੀ ਸੀ ਜਿਸਦੀ ਹਕੀਕਤ ਦੇਸ਼ ਵਾਸੀਆਂ ਨੂੰ ਹੁਣ ਸਮਝ ਆ ਰਹੀ ਹੈ।
ਕਿਸਾਨ ਆਗੂਆਂ ਨੇ ਤਿੰਨੇ ਕਾਲੇ ਕਾਨੂੰਨਾ ਖਿਲਾਫ ਆਰ- ਪਾਰ ਦੀ ਲੜਾਈ ਦਾ ਐਲਾਨ ਕਰਦਿਆਂ ਕਿਹਾ ਕਿ ਹੁਣ ਦੇਸ਼ ਦਾ ਅੰਨਦਾਤਾ ਅਤੇ ਮਜਦੂਰ ਆਪਣੇ ਹੱਕਾਂ ਦੀ ਪ੍ਰਾਪਤੀ ਅਤੇ ਕਾਲੇ ਕਾਨੂੰਨਾ ਦੀ ਵਾਪਸੀ ਤੱਕ ਚੈਨ ਨਾਲ ਨਹੀਂ ਬੈਠੇਗਾ ਅਤੇ ਕਿਸਾਨਾ ਤੇ ਮਿਹਨਕਸ਼ਾ ਵੱਲੋਂ ਕੀਤੇ ਜਾ ਰਹੇ ਇਸ ਸੰਘਰਸ਼ ਦੇ ਅੱਗੇ ਗੋਡੇ ਟੇਕਣੇ ਪੈਣਗੇ। ਇਸ ਮੌਕੇ ਧਰਨਾਕਾਰੀਆਂ ਵੱਲੋਂ ਉੱਤਰ ਪ੍ਰਦੇਸ਼ ਵਿਥੇ ਦਰਿੰਦਿਆਂ ਵੱਲੋਂ ਬਲਾਤਕਾਰ ਕਰਨ ਉਪਰੰਤ ਮੌਤ ਦੇ ਘਾਟ ਉਤਾਰੀ ਗਈ ਦਲਿਤ ਲੜਕੀ ਮਨੀਸ਼ਾਂ ਨੂੰ ਸ਼ਰਧਾਂਜਲੀ ਭੇਂਟ ਕਰਦਿਆਂ ਦਰਿੰਦਿਆਂ ਨੂੰ ਫਾਂਸੀ ਦੀ ਸਜਾ ਦੇਣ ਦੀ ਮੰਗ ਵੀ ਕੀਤੀ ਗਈ ।
ਇਸ ਮੌਕੇ ਤੇਜਾ ਸਿੰਘ ਬੜੈਚ, ਨੰਬੜਦਾਰ ਰਣਜੀਤ ਸਿੰਘ, ਭੁਪਿੰਦਰ ਸਿੰਘ ਬੜੈਚ, ਰਜਿੰਦਰ ਸਿੰਘ ਬਿੱਲੂ, ਸਾਧੂ ਸਿੰਘ ਬੜੈਚ, ਜਸਪ੍ਰੀਤ ਬੜੈਚ, ਭਜਨ ਸਿੰਘ ਦਾਖਾ, ਮੋਹਣ ਸਿੰਘ ਮੁੱਲਾਂਪੁਰ, ਸਰਬਜੀਤ ਸਿੰਘ ਕੈਲਪੁਰ, ਬਾਬੂ ਰਾਮ, ਸਹਿਦੇਵ ਗੋਇਲ, ਆੜ੍ਹਤੀ ਸ਼ੰਕਰ, ਵਿਜੇ ਮਲਹੋਤਰਾ, ਨਰਿੰਦਰ ਸਿੰਘ ਬੜੈਚ, ਸਤੀਸ਼ ਸ਼ਰਮਾ, ਬਲਸ਼ਰਨਪ੍ਰੀਤ ਸਿੰਘ ਬੜੈਚ, ਪਰਮਿੰਦਰ ਸਿੰਘ, ਅਰਸ਼ਪ੍ਰੀਤ ਸਿੰਘ ਆਦਿ ਹਾਜਰ ਸਨ।