ਲੁਧਿਆਣਾ: ਪੱਤਰਕਾਰੀ ਦੇ ਖੇਤਰ ‘ਚ ਲੰਬਾ ਸਮਾਂ ਸੇਵਾਵਾਂ ਦੇਣ ਵਾਲੇ ਬਿਜਲੀ ਨਿਗਮ ਦੇ ਮੁਲਾਜਮ ਆਗੂ ਗੁਰਪ੍ਰੀਤ ਸਿੰਘ ਮਹਿਦੂਦਾਂ ਨੇ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦਾ ਪੱਤਰਕਾਰਾਂ ਅਤੇ ਬਿਜਲੀ ਕਾਮਿਆਂ ਨੂੰ ਕੋਰੋਨਾ ਯੋਧਿਆਂ ਦੀ ਸ਼੍ਰੇਣੀ ‘ਚ ਰੱਖਣ ‘ਤੇ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ ਕਿ ਏਹ ਪੱਤਰਕਾਰਾਂ ਅਤੇ ਬਿਜਲੀ ਕਾਮਿਆਂ ਦੀ ਮੁੱਖ ਮੰਗ ਵੀ ਸੀ ਅਤੇ ਹੁਣ ਤੱਕ ਇਸ ਨੂੰ ਪੂਰਾ ਨਾ ਕੀਤੇ ਜਾਣ ਕਾਰਨ ਦੋਵਾਂ ਵਰਗਾਂ ਵਿੱਚ ਨਾਮੌਸ਼ੀ ਵੀ ਸੀ ਕਿਉਂਕਿ ਏਹ ਸੁਰੱਖਿਆ ਦੇ ਨਾਲ ਨਾਲ ਸਨਮਾਨ ਨਾਲ ਜੁੜਿਆ ਮਾਮਲਾ ਬਣ ਗਿਆ ਸੀ। ਸ: ਮਹਿਦੂਦਾਂ ਨੇ ਕਿਹਾ ਕਿ ਕੋਰੋਨਾ ਮਹਾਂਮਾਰੀ ਦੇ ਪਹਿਲੇ ਦੌਰ ਉਨ੍ਹਾਂ ਖੁਦ ਵੀ ਪਹਿਲੀ ਕਤਾਰ ਵਿੱਚ ਰਹਿ ਕੇ ਪੱਤਰਕਾਰਤਾ ਕੀਤੀ ਹੈ।
ਉਸ ਵੇਲੇ ਪੱਤਰਕਾਰਾਂ ਨੂੰ ਕੋਰੋਨਾ ਯੋਧੇ ਨਾ ਐਲਾਨੇ ਜਾਣ ਤੇ ਸਮੁੱਚੇ ਪੱਤਰਕਾਰ ਵਰਗ ਵਿੱਚ ਸਰਕਾਰਾਂ ਪ੍ਰਤੀ ਰੋਸ ਸੀ ਅਤੇ ਇਸਦੇ ਬਾਵਯੂਦ ਹਰ ਪੱਤਰਕਾਰ ਵੱਲੋਂ ਕੋਰੋਨਾ ਮਹਾਂਮਾਰੀ ਕਾਰਨ ਬਣ ਰਹੇ ਡਰ ਅਤੇ ਖੌਫ ਦੇ ਮਾਹੌਲ ਨੂੰ ਕਾਬੂ ਕਰਕੇ ਘਟਾਉਣ ਦੀਆਂ ਕੋਸ਼ਿਸਾਂ ਕੀਤੀਆਂ ਗਈਆਂ। ਏਸੇ ਪ੍ਰਕਾਰ ਕੋਰੋਨਾ ਮਹਾਂਮਾਰੀ ਦੇ ਦੌਰ ‘ਚ ਲੱਗੇ ਲਾਕਡਾਊਨ ਕਾਰਨ ਲੋਕਾਂ ਨੂੰ ਘਰਾਂ ਅੰਦਰ ਹੀ ਰਹਿਣਾ ਪੈ ਰਿਹਾ ਸੀ। ਉਨ੍ਹਾਂ ਨੂੰ ਨਿਵਿਘਨ ਬਿਜਲੀ ਸਪਲਾਈ ਦੇਣੀ ਜਰੂਰੀ ਹੋ ਗਈ ਸੀ। ਇਸਤੋਂ ਇਲਾਵਾ ਬਿਜਲੀ ਕਾਮਿਆਂ ਨੂੰ ਕਈ ਅਜਿਹੀਆਂ ਥਾਵਾਂ ‘ਤੇ ਵੀ ਸੇਵਾਵਾਂ ਦੇਣ ਜਾਣਾ ਪੈ ਰਿਹਾ ਸੀ ਜਿੱਥੇ ਕੋਰੋਨਾ ਵਾਇਰਸ (ਕੋਵਿਡ-19) ਦਾ ਖਤਰਾ ਜਿਆਦਾ ਸੀ। ਅਜਿਹੀ ਸਥਿਤੀ ‘ਚ ਬਿਜਲੀ ਕਾਮਿਆਂ ਨੂੰ ਪੱਤਰਕਾਰਾਂ ਵਾਂਗ ਖੁਦ ਦੀ ਅਸੁਰੱਖਿਆ ਦੀ ਚਿੰਤਾ ਸੀ। ਪੰਜਾਬ ਸਰਕਾਰ ਵੱਲੋਂ ਲਏ ਇਸ ਸਲਾਘਾਯੋਗ ਫੈਸਲੇ ਕਾਰਨ ਹੁਣ ਉਹ ਬਿਨ੍ਹਾਂ ਕਿਸੇ ਡਰ-ਭੈਅ ਦੇ ਅਪਣੀਆਂ ਸੇਵਾਵਾਂ ਦੇਣਗੇ। ਉਨ੍ਹਾਂ ਕਿਹਾ ਕਿ ਕੇਂਦਰ ਸਰਕਾਰ ਵੀ ਪੰਜਾਬ ਸਰਕਾਰ ਦੇ ਨਕਸ਼ੇ ਕਦਮ ‘ਤੇ ਚੱਲਦਿਆਂ ਪੱਤਰਕਾਰਾਂ ਅਤੇ ਬਿਜਲੀ ਕਾਮਿਆਂ ਨੂੰ ਅਪਣੇ ਪੱਧਰ ‘ਤੇ ਕੋਰੋਨਾ ਯੋਧਿਆ ਦੀ ਸ਼੍ਰੇਣੀ ਵਿੱਚ ਰੱਖ ਬਣਦੀਆਂ ਸਹੂਲਤਾਂ ਦੇਵੇ।