ਲੁਧਿਆਣਾ, 26 ਅਗਸਤ : ਲੁਧਿਆਣਾ ਵਿੱਚ ਨਸ਼ੇ ਦੀ ਲਤ ਦਾ ਸ਼ਿਕਾਰ ਹੋਈ ਥਾਈਲੈਂਡ ਦੀ ਇੱਕ 34 ਸਾਲਾ ਮਹਿਲਾ ਦੀ ਕਹਾਣੀ ਸਾਹਮਣੇ ਆਈ ਹੈ। ਕਰੀਬ ਡੇਢ ਤੋਂ ਦੋ ਸਾਲ ਪਹਿਲਾਂ ਲੁਧਿਆਣਾ ਆਈ ਇਹ ਮਹਿਲਾ ਇੱਥੇ ਇੱਕ ਮਸਾਜ ਪਾਰਲਰ ਵਿੱਚ ਕੰਮ ਕਰਦੀ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਹੌਲੀ-ਹੌਲੀ ਉਹ ਆਈਸ (ਚਿੱਟਾ), ਭੰਗ ਅਤੇ ਸ਼ਰਾਬ ਦੀ ਆਦੀ ਹੋ ਗਈ, ਜਿਸ ਕਾਰਨ ਉਸ ਦੀ ਮਾਨਸਿਕ ਹਾਲਤ ਵੀ ਪ੍ਰਭਾਵਿਤ ਹੋਈ।
ਜਾਣਕਾਰੀ ਮੁਤਾਬਕ ਮਹਿਲਾ ਦੀ ਪਛਾਣ ਚੈਮਾਈਪੋਰਨ ਯੇਨਯਿੰਗ ਵਜੋਂ ਹੋਈ ਹੈ। ਉਸ ਦੇ ਪਾਸਪੋਰਟ ਅਨੁਸਾਰ ਉਸ ਦਾ ਜਨਮ ਅਗਸਤ 1991 ਵਿੱਚ ਹੋਇਆ ਹੈ ਅਤੇ ਉਹ ਥਾਈਲੈਂਡ ਦੇ ਬੁਰੀ ਰਾਮ ਇਲਾਕੇ ਨਾਲ ਸਬੰਧਤ ਹੈ। ਮਹਿਲਾ ਵਾਰ-ਵਾਰ ਥਾਈਲੈਂਡ ਵਿੱਚ ਆਪਣੀ 13 ਸਾਲਾ ਧੀ ਹੋਣ ਦੀ ਗੱਲ ਕਰ ਰਹੀ ਹੈ, ਹਾਲਾਂਕਿ ਉਸ ਦੇ ਬਿਆਨਾਂ ਵਿੱਚ ਕੁਝ ਅਸੰਗਤਤਾ ਵੀ ਸਾਹਮਣੇ ਆਈ ਹੈ।
ਲੁਧਿਆਣਾ ਵਾਸੀ ਜਸਕੀਰਤ ਸਿੰਘ ਮੁਤਾਬਕ ਉਹ ਇਸ ਮਹਿਲਾ ਨੂੰ ਕਰੀਬ ਇੱਕ ਸਾਲ ਤੋਂ ਜਾਣਦੇ ਹਨ। ਉਨ੍ਹਾਂ ਦੱਸਿਆ ਕਿ ਲੁਧਿਆਣਾ ਆਉਣ ਤੋਂ ਪਹਿਲਾਂ ਉਹ ਦਿੱਲੀ ਅਤੇ ਮੁੰਬਈ ਸਮੇਤ ਹੋਰ ਸ਼ਹਿਰਾਂ ਦੇ ਮਸਾਜ ਪਾਰਲਰਾਂ ਵਿੱਚ ਵੀ ਕੰਮ ਕਰ ਚੁੱਕੀ ਸੀ। ਜਦੋਂ ਉਹ ਪਹਿਲੀ ਵਾਰ ਉਸ ਨੂੰ ਮਿਲੇ ਸਨ ਤਾਂ ਉਸ ਦੀ ਹਾਲਤ ਠੀਕ ਸੀ, ਪਰ ਬਾਅਦ ਵਿੱਚ ਉਹ ਨਸ਼ੇ ਦੀ ਗ੍ਰਿਫ਼ਤ ਵਿੱਚ ਆ ਗਈ।
ਨਸ਼ੇ ਕਾਰਨ ਉਸ ਦੀ ਮਾਨਸਿਕ ਸਥਿਤੀ ਕਾਫ਼ੀ ਵਿਗੜ ਗਈ ਅਤੇ ਉਹ ਕਈ ਵਾਰ ਸੜਕਾਂ ’ਤੇ ਭਟਕਦੀ ਅਤੇ ਲੋਕਾਂ ਨਾਲ ਝਗੜਦੀ ਨਜ਼ਰ ਆਈ। ਜਸਕੀਰਤ ਸਿੰਘ ਦੇ ਦੱਸਣ ਮੁਤਾਬਕ, ਮਹਿਲਾ ਨੇ ਇੱਕ ਹੋਟਲ ਦੀ ਛੱਤ ਤੋਂ ਛਾਲ ਮਾਰ ਕੇ ਖੁਦਕੁਸ਼ੀ ਕਰਨ ਦੀ ਕੋਸ਼ਿਸ਼ ਵੀ ਕੀਤੀ ਸੀ। ਇਸ ਤੋਂ ਬਾਅਦ ਉਸ ਨੂੰ ਹੋਟਲ ਦੀ ਨੌਕਰੀ ਤੋਂ ਕੱਢ ਦਿੱਤਾ ਗਿਆ ਅਤੇ ਦੂਜੇ ਹੋਟਲ ਵਿੱਚ ਮਿਲੀ ਨੌਕਰੀ ਵੀ ਜ਼ਿਆਦਾ ਸਮਾਂ ਨਹੀਂ ਚੱਲ ਸਕੀ।
ਸੋਸ਼ਲ ਮੀਡੀਆ ਵੀਡੀਓ ਰਾਹੀਂ ਹੋਈ ਮਦਦ
ਮਹਿਲਾ ਦੀ ਵੀਡੀਓ ਸੋਸ਼ਲ ਮੀਡੀਆ ’ਤੇ ਸਾਹਮਣੇ ਆਉਣ ਤੋਂ ਬਾਅਦ ਜਸਕੀਰਤ ਸਿੰਘ ਨੇ ਉਸ ਦੀ ਪਛਾਣ ਕੀਤੀ ਅਤੇ ਮਦਦ ਲਈ ਅੱਗੇ ਆਏ। ਉਨ੍ਹਾਂ ਨੇ ਆਪਣੇ ਦੋਸਤਾਂ ਨਾਲ ਸੰਪਰਕ ਕਰਕੇ ਮਹਿਲਾ ਨੂੰ ਪਹਿਲਾਂ ਇੱਕ ਹੋਟਲ ਵਿੱਚ ਠਹਿਰਾਇਆ ਅਤੇ ਇਸ ਬਾਰੇ ‘ਮਨੁੱਖਤਾ ਦੀ ਸੇਵਾ’ ਸੰਸਥਾ ਦੇ ਸੇਵਾਦਾਰ ਗੁਰਪ੍ਰੀਤ ਸਿੰਘ ਮਿੰਟੂ ਨੂੰ ਜਾਣਕਾਰੀ ਦਿੱਤੀ। ਅਗਲੀ ਸਵੇਰ ਹੋਟਲ ਤੋਂ ਬਾਹਰ ਆਉਣ ਤੋਂ ਬਾਅਦ ਸੰਸਥਾ ਦੇ ਸੇਵਾਦਾਰ ਮਹਿਲਾ ਨੂੰ ਆਪਣੇ ਨਾਲ ‘ਸੁਪਨਿਆਂ ਦਾ ਘਰ’ ਆਸ਼ਰਮ ਵਿੱਚ ਲੈ ਗਏ।
ਆਸ਼ਰਮ ਵਿੱਚ ਇਲਾਜ ਸ਼ੁਰੂ
ਫਿਲਹਾਲ ਮਹਿਲਾ ਨੂੰ ‘ਸੁਪਨਿਆਂ ਦਾ ਘਰ’ ਵਿੱਚ ਰੱਖਿਆ ਗਿਆ ਹੈ, ਜਿੱਥੇ ਡਾਕਟਰਾਂ ਅਤੇ ਸੇਵਾਦਾਰਾਂ ਦੀ ਨਿਗਰਾਨੀ ਹੇਠ ਉਸ ਦਾ ਇਲਾਜ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਸੰਸਥਾ ਦਾ ਉਦੇਸ਼ ਪਹਿਲਾਂ ਉਸ ਦੀ ਸਿਹਤ ਅਤੇ ਮਾਨਸਿਕ ਸਥਿਤੀ ਨੂੰ ਸਥਿਰ ਕਰਨਾ ਹੈ। ਇਸ ਦੇ ਨਾਲ ਹੀ ਸੰਸਥਾ ਨੇ ਉਸ ਦੇ ਪਾਸਪੋਰਟ ਵਿੱਚ ਦਰਜ ਜਾਣਕਾਰੀ ਦੇ ਆਧਾਰ ’ਤੇ ਥਾਈਲੈਂਡ ਵਿੱਚ ਉਸ ਦੇ ਪਰਿਵਾਰ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਸੰਸਥਾ ਦੀ ਕੋਸ਼ਿਸ਼ ਹੈ ਕਿ ਮਹਿਲਾ ਦੇ ਠੀਕ ਹੋਣ ਤੋਂ ਬਾਅਦ ਉਸ ਨੂੰ ਸੁਰੱਖਿਅਤ ਤਰੀਕੇ ਨਾਲ ਉਸ ਦੇ ਪਰਿਵਾਰ ਤੱਕ ਪਹੁੰਚਾਇਆ ਜਾ ਸਕੇ। ‘ਮਨੁੱਖਤਾ ਦੀ ਸੇਵਾ’ ਪਰਿਵਾਰ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਥਾਈਲੈਂਡ ਨਾਲ ਸਬੰਧਤ ਕੋਈ ਵਿਅਕਤੀ ਇਸ ਮਹਿਲਾ ਨੂੰ ਪਛਾਣਦਾ ਹੈ ਜਾਂ ਉਸ ਦੇ ਪਰਿਵਾਰ ਬਾਰੇ ਜਾਣਕਾਰੀ ਰੱਖਦਾ ਹੈ ਤਾਂ ਸੰਸਥਾ ਨਾਲ ਸੰਪਰਕ ਕਰੇ, ਤਾਂ ਜੋ ਉਸ ਨੂੰ ਜਲਦ ਤੋਂ ਜਲਦ ਆਪਣੇ ਪਰਿਵਾਰ ਨਾਲ ਮਿਲਾਇਆ ਜਾ ਸਕੇ।