ਚੰਡੀਗੜ੍ਹ : ਮੀਂਹ ਤੋਂ ਬਾਅਦ ਤਾਪਮਾਨ ਵਿੱਚ ਗਿਰਾਵਟ ਕਾਰਨ ਬਿਜਲੀ ਦੀ ਮੰਗ ਵਿੱਚ ਕਮੀ ਆਈ ਹੈ। ਆਗਾਮੀ ਝੋਨੇ ਦੇ ਸੀਜ਼ਨ ਵਿੱਚ ਬਿਜਲੀ ਦੀ ਵਧਦੀ ਮੰਗ ਨੂੰ ਦੇਖਦੇ ਹੋਏ ਪਾਵਰਕੌਮ ਨੇ ਕੋਲੇ ਦਾ ਸਟਾਕ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਲਹਿਰਾ ਮੁਹੱਬਤ-4 ਅਤੇ ਰੋਪੜ ਪਾਵਰ ਥਰਮਲ ਪਲਾਂਟ ਦੇ 5 ਯੂਨਿਟ ਬੰਦ ਕਰ ਦਿੱਤੇ ਗਏ ਹਨ।
ਇਸ ਤੋਂ ਇਲਾਵਾ ਪ੍ਰਾਈਵੇਟ ਸੈਕਟਰ ਨਾਭਾ ਪਾਵਰ, ਟੀਐਸਪੀਐਲ ਅਤੇ ਜੀਵੀਕੇ ਪਾਵਰ ਥਰਮਲ ਪਲਾਂਟਾਂ ਦੀ ਬਿਜਲੀ ਉਤਪਾਦਨ ਸਮਰੱਥਾ ਅੱਧੀ ਕਰ ਦਿੱਤੀ ਗਈ ਹੈ ਤਾਂ ਜੋ ਇੱਥੋਂ ਵੀ ਕੋਲੇ ਦਾ ਭੰਡਾਰ ਵਧਾਇਆ ਜਾ ਸਕੇ।ਸੋਮਵਾਰ ਸ਼ਾਮ 5 ਵਜੇ ਤੱਕ ਬਿਜਲੀ ਦੀ ਅਧਿਕਤਮ ਮੰਗ 5, 908 ਮੈਗਾਵਾਟ ਦਰਜ ਕੀਤੀ ਗਈ ਜਦੋਂ ਕਿ ਉਤਪਾਦਨ 3, 404 ਮੈਗਾਵਾਟ ਸੀ। ਬਾਕੀ ਮੰਗ ਕੇਂਦਰੀ ਪੁਲ ਤੋਂ ਬਿਜਲੀ ਲੈ ਕੇ ਕੰਮ ਚਲਾਇਆ ਗਿਆ।ਜਿਕਰਯੋਗ ਹੈ ਕਿ ਪੰਜਾਬ ਦੇ ਪੰਜ ਪਾਵਰ ਥਰਮਲ ਪਲਾਂਟਾਂ ਤੋਂ ਪੂਰੀ ਸਮਰੱਥਾ ਨਾਲ ਬਿਜਲੀ ਪੈਦਾ ਕਰਨ ਲਈ ਰੋਜ਼ਾਨਾ 75 ਮੀਟ੍ਰਿਕ ਟਨ ਕੋਲੇ ਦੀ ਲੋੜ ਹੁੰਦੀ ਹੈ।ਇਨ੍ਹਾਂ ਵਿੱਚੋਂ ਰੋਪੜ ਵਿੱਚ 12.8 ਮੀਟਰਕ ਟਨ ਕੋਲੇ ਦੀ ਲੋੜ ਹੈ, ਲਹਿਰਾ-11 ਮੀਟਰਕ ਟਨ, ਐਨਪੀਐਲ-18 ਮੀਟਰਕ ਟਨ, ਟੀਐਸਪੀਐਲ-26 ਮੀਟਰਕ ਟਨ, ਇਸੇ ਤਰ੍ਹਾਂ ਜੀਵੀਕੇ ਪਾਵਰ ਥਰਮਲ ਪਲਾਂਟ ਵਿੱਚ 7 ਮੀਟਰਕ ਟਨ ਕੋਲੇ ਦੀ ਲੋੜ ਹੈ। ਹੁਣ ਰੋਪੜ ਅਤੇ ਲਹਿਰਾ ਮੁਹੱਬਤ ਪਾਵਰ ਥਰਮਲ ਪਲਾਂਟ ਬੰਦ ਕਰ ਦਿੱਤੇ ਗਏ ਹਨ ਅਤੇ ਹੋਰ ਪਲਾਂਟ ਅੱਧੀ ਸਮਰੱਥਾ 'ਤੇ ਚੱਲ ਰਹੇ ਹਨ। ਅਜਿਹਾ ਕਰਨ ਨਾਲ ਕਰੀਬ 30 ਮੀਟ੍ਰਿਕ ਟਨ ਕੋਲੇ ਦੀ ਬਚਤ ਹੋਵੇਗੀ।