- ਸਤਲੁਜ ਪਬਲਿਕ ਸਕੂਲ ਤੋਂ 'ਟਰੈਕ ਏਡ' ਅਤੇ ਡੀਸੀਐਮ ਗਰੁੱਪ ਆਫ਼ ਸਕੂਲਜ਼ ਤੋਂ 'ਸਕਿੱਲਵੋਰਾ ਏਆਈ' ਸਾਂਝੇ ਜੇਤੂ ਰਹੇ
- ਟੀਵਾਈਈ ਨੈਸ਼ਨਲ ਫਾਈਨਲਜ਼ ਵਿੱਚ ਕਰੇਗੀ ਖੇਤਰ ਦੀ ਨੁਮਾਇੰਦਗੀ
ਮੋਹਾਲੀ, 13 ਮਈ, 2026 (ਹਰਜਿੰਦਰ ਸਿੰਘ ਭੱਟੀ) : ਟੀਆਈਈ ਚੰਡੀਗੜ੍ਹ ਨੇ ਇੰਡੀਅਨ ਸਕੂਲ ਆਫ਼ ਬਿਜ਼ਨਸ (ਆਈਐਸਬੀ), ਮੋਹਾਲੀ ਦੇ ਐਮਪੀਐਚ ਹਾਲ ਵਿਖੇ ਟੀਆਈਈ ਯੰਗ ਐਂਟਰਪ੍ਰੈਨਯੋਰਜ਼ (ਟੀਵਾਈਈ) ਚੈਪਟਰ ਫਾਈਨਲਜ਼ 2025-26 ਦਾ ਸਫਲਤਾਪੂਰਵਕ ਆਯੋਜਨ ਕੀਤਾ। ਖੇਤਰ ਦੇ ਮੋਹਰੀ ਸਕੂਲਾਂ ਦੇ ਪ੍ਰਤਿਭਾਸ਼ਾਲੀ ਵਿਦਿਆਰਥੀ ਉੱਦਮੀਆਂ ਨੇ ਇਸ ਪ੍ਰੋਗਰਾਮ ਵਿੱਚ ਹਿੱਸਾ ਲਿਆ ਤੇ ਆਪਣੇ ਨਵੀਨਤਾਕਾਰੀ ਸਟਾਰਟਅੱਪ ਵਿਚਾਰ ਪੇਸ਼ ਕੀਤੇ।
ਵੱਖ-ਵੱਖ ਸਕੂਲਾਂ ਦੀਆਂ 19 ਟੀਮਾਂ ਨੇ ਮੁਕਾਬਲੇ ਵਿੱਚ ਹਿੱਸਾ ਲਿਆ, ਜਿਨ੍ਹਾਂ ਵਿੱਚੋਂ ਨੌਂ ਨੇ ਫਾਈਨਲ ਰਾਊਂਡ ਵਿੱਚ ਜਗ੍ਹਾ ਬਣਾਈ। ਇਨ੍ਹਾਂ ਵਿੱਚ ਸਤਲੁਜ ਪਬਲਿਕ ਸਕੂਲ ਤੋਂ ਚਾਰ ਅਤੇ ਡੀਸੀਐਮ ਗਰੁੱਪ ਆਫ਼ ਸਕੂਲਜ਼ ਤੋਂ ਪੰਜ ਸ਼ਾਮਲ ਸਨ। ਵਿਦਿਆਰਥੀਆਂ ਨੇ ਨਵੀਨਤਾ, ਸਮੱਸਿਆ-ਹੱਲ, ਸਮਾਜਿਕ ਪ੍ਰਭਾਵ ਅਤੇ ਸਥਿਰਤਾ ਦੇ ਆਧਾਰ 'ਤੇ ਜਿਊਰੀ ਨੂੰ ਆਪਣੇ ਕਾਰੋਬਾਰੀ ਮਾਡਲ ਪੇਸ਼ ਕੀਤੇ।
ਇਸ ਪ੍ਰੋਗਰਾਮ ਦਾ ਮੁਲਾਂਕਣ ਵਿਸ਼ੇਸ਼ ਜਿਊਰੀ ਮੈਂਬਰਾਂ ਡਾ. ਦਪਿੰਦਰ ਕੌਰ ਬਖਸ਼ੀ, ਸੰਯੁਕਤ ਨਿਰਦੇਸ਼ਕ, ਪੰਜਾਬ ਸਟੇਟ ਕੌਂਸਲ ਫਾਰ ਸਾਇੰਸ ਐਂਡ ਟੈਕਨਾਲੋਜੀ, ਸੋਮਵੀਰ ਆਨੰਦ, ਸੀਈਓ ਤੇ ਮਿਸ਼ਨ ਡਾਇਰੈਕਟਰ, ਇਨੋਵੇਸ਼ਨ ਮਿਸ਼ਨ ਪੰਜਾਬ ਅਤੇ ਸ਼ੁਭਮ ਸਾਗਰ ਸਾਹੂ, ਸੀਨੀਅਰ ਪ੍ਰੋਗਰਾਮ ਮੈਨੇਜਰ, ਏਆਈਸੀ-ਆਈਐਸਬੀ ਦੁਆਰਾ ਕੀਤਾ ਗਿਆ। ਜਿਊਰੀ ਨੇ ਵਿਦਿਆਰਥੀਆਂ ਦੀ ਸਿਰਜਣਾਤਮਕਤਾ, ਵਿਸ਼ਵਾਸ ਅਤੇ ਪੇਸ਼ਕਾਰੀ ਦੇ ਹੁਨਰ ਦੀ ਸ਼ਲਾਘਾ ਕੀਤੀ।
ਮੁੱਖ ਮਹਿਮਾਨ ਡਾ. ਰਜਨੀਸ਼ ਸ਼ਰਮਾ, ਵਾਈਸ ਚਾਂਸਲਰ, ਚਿਤਕਾਰਾ ਯੂਨੀਵਰਸਿਟੀ (ਐਚਪੀ), ਹਰਿਤ ਮੋਹਨ, ਟੀਆਈਈ ਗਲੋਬਲ ਬੀਓਟੀ 2026-27 ਅਤੇ ਸਾਬਕਾ ਪ੍ਰਧਾਨ, ਟੀਆਈਈ ਚੰਡੀਗੜ੍ਹ, ਪੁਨੀਤ ਵਰਮਾ, ਪ੍ਰਧਾਨ, ਟੀਆਈਈ ਚੰਡੀਗੜ੍ਹ ਅਤੇ ਡਾ. ਗੋਪਨ ਗੋਪਾਲਕ੍ਰਿਸ਼ਨਨ, ਡਿਪਟੀ ਸੀਈਓ, ਡੀਸੀਐਮ ਗਰੁੱਪ ਆਫ਼ ਸਕੂਲਜ਼ ਨੇ ਵਿਦਿਆਰਥੀਆਂ ਨੂੰ ਉਤਸ਼ਾਹਿਤ ਕੀਤਾ।
ਟੀਆਈਈ ਚੰਡੀਗੜ੍ਹ ਦੇ ਪ੍ਰਧਾਨ ਪੁਨੀਤ ਵਰਮਾ ਨੇ ਕਿਹਾ ਕਿ ਟੀਆਈਈ ਪ੍ਰੋਗਰਾਮ ਵਿਦਿਆਰਥੀਆਂ ਨੂੰ ਸਲਾਹ, ਵਿਹਾਰਕ ਅਨੁਭਵ ਅਤੇ ਵਪਾਰਕ ਚੁਣੌਤੀਆਂ ਦਾ ਸਾਹਮਣਾ ਕਰਨ ਦਾ ਮੌਕਾ ਪ੍ਰਦਾਨ ਕਰਕੇ ਭਵਿੱਖ ਦੇ ਸਟਾਰਟਅੱਪ ਸੰਸਥਾਪਕ ਤੇ ਨਵੀਨਤਾਕਾਰੀ ਬਣਨ ਲਈ ਤਿਆਰ ਕਰ ਰਿਹਾ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਵਿਦਿਆਰਥੀਆਂ ਦੁਆਰਾ ਪੇਸ਼ ਕੀਤੇ ਗਏ ਵਿਚਾਰ ਟ੍ਰਾਈਸਿਟੀ ਦੇ ਨੌਜਵਾਨਾਂ ਵਿੱਚ ਵਧ ਰਹੀ ਉੱਦਮੀ ਸੰਭਾਵਨਾ ਨੂੰ ਦਰਸਾਉਂਦੇ ਹਨ।
ਉਨ੍ਹਾਂ ਦੱਸਿਆ ਕਿ ਟੀਆਈਈ ਚੰਡੀਗੜ੍ਹ ਨੇ ਮੁਕਾਬਲੇ ਵਿੱਚ ਭਾਗ ਲੈਣ ਵਾਲੇ ਵਿਦਿਆਰਥੀਆਂ ਵਿੱਚ ਕੁੱਲ 2 ਲੱਖ ਰੁਪਏ ਦੀ ਇਨਾਮੀ ਰਾਸ਼ੀ ਵੰਡੀ। ਜੇਤੂ ਟੀਮਾਂ ਹੁਣ ਟੀਆਈਈ ਨੈਸ਼ਨਲ ਫਾਈਨਲਜ਼ ਵਿੱਚ ਖੇਤਰ ਦੀ ਨੁਮਾਇੰਦਗੀ ਕਰਨਗੀਆਂ।
ਜੇਤੂ ਟੀਮਾਂ ਟ੍ਰੈਕ ਏਡ (ਸਤਲੁਜ ਪਬਲਿਕ ਸਕੂਲ) ਅਤੇ ਸਕਿੱਲ ਵੋਰਾ ਏਆਈ (ਡੀਸੀਐਮ ਗਰੁੱਪ ਆਫ਼ ਸਕੂਲਜ਼) ਸਨ, ਜਿਨ੍ਹਾਂ ਵਿੱਚੋਂ ਪਹਿਲੇ ਰਨਰ-ਅੱਪ ਬਾਇਓ ਰੈਪ (ਸਤਲੁਜ ਪਬਲਿਕ ਸਕੂਲ) ਅਤੇ ਦੂਜੇ ਰਨਰ-ਅੱਪ ਮਾਈ ਕੋਫੋਰਜ (ਡੀਸੀਐਮ ਗਰੁੱਪ ਆਫ਼ ਸਕੂਲਜ਼) ਰਹੇ।
ਇਸ ਪ੍ਰੋਗਰਾਮ ਦਾ ਸਮਾਪਨ ਜੇਤੂਆਂ ਦੇ ਸਨਮਾਨ, ਇਨਾਮ ਵੰਡ ਅਤੇ ਧੰਨਵਾਦ ਦੇ ਨਾਲ ਹੋਇਆ।