ਹੁਸ਼ਿਆਰਪੁਰ, 17 ਜੁਲਾਈ: ਹੁਸ਼ਿਆਰਪੁਰ ਦੇ ਦਸੂਹਾ ਵਿੱਚ, ਇੱਕ ਤੇਂਦੂਏ ਨੇ ਇੱਕ ਘਰ ਵਿੱਚ ਦਾਖਲ ਹੋ ਕੇ ਇੱਕ ਵੱਛੀ ਨੂੰ ਮਾਰ ਦਿੱਤਾ। ਇਹ ਘਟਨਾ ਸੀਸੀਟੀਵੀ ਵਿੱਚ ਕੈਦ ਹੋ ਗਈ ਹੈ। ਸੀਸੀਟੀਵੀ ਫੁਟੇਜ ਵਿੱਚ ਤੇਂਦੂਆ ਕੰਧ ਟੱਪ ਕੇ ਘਰ ‘ਚ ਦਾਖਲ ਹੋਇਆ ਅਤੇ ਬੰਨ੍ਹੀ ਹੋਈ ਵੱਛੀ ਨੂੰ ਮਾਰ ਦਿੱਤਾ।
ਵੱਛੀ ਦਾ ਸ਼ਿਕਾਰ ਕਰਦੇ ਤੇਂਦੂਏ ਦਾ ਇਹ ਵੀਡੀਓ ਦਿਲ ਦਹਿਲਾ ਦੇਣ ਵਾਲਾ ਹੈ ਅਤੇ ਇਹ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਿਹਾ ਹੈ। ਵੱਛੀ ਤੇਂਦੂਏ ਤੋਂ ਆਪਣੀ ਜਾਨ ਬਚਾਉਣ ਲਈ ਸੰਘਰਸ਼ ਕਰਦੀ ਹੈ ਅਤੇ ਪਰ ਤੇਂਦੂਆ ਉਸ ਦਾ ਸ਼ਿਕਾਰ ਕਰ ਲੈਂਦਾ ਹੈ।
ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਵੀਰਵਾਰ ਦੇਰ ਰਾਤ ਉਪਲਾ ਵਡਾਲਾ ਪਿੰਡ ਦੇ ਇੱਕ ਰਿਹਾਇਸ਼ੀ ਖੇਤਰ ਵਿੱਚ ਇੱਕ ਤੇਂਦੂਆ ਦਾਖਲ ਹੋਇਆ ਸੀ। ਉਪਲਾ ਵਡਾਲਾ ਸ਼ਿਵ ਮੰਦਿਰ ਦੇ ਮੈਨੇਜਰ ਪੰਡਿਤ ਗਿਆਨ ਚੰਦ ਅਤੇ ਉਨ੍ਹਾਂ ਦੇ ਪੋਤੇ ਚੰਦਨ ਸ਼ਰਮਾ ਨੇ ਕਿਹਾ ਕਿ ਉਨ੍ਹਾਂ ਦੇ ਘਰ ਤੋਂ ਸੀਸੀਟੀਵੀ ਫੁਟੇਜ ਵਿੱਚ ਤੇਂਦੂਆ ਰਾਤ 12:22 ਵਜੇ ਲਿੰਕ ਰੋਡ ‘ਤੇ ਘਰ ਵੱਲ ਆਉਂਦਾ ਦੇਖਿਆ ਗਿਆ।
ਘਟਨਾ ਤੋਂ ਬਾਅਦ ਪੰਚਾਇਤ ਨੇ ਜੰਗਲੀ ਜੀਵ ਵਿਭਾਗ ਨੂੰ ਸੂਚਿਤ ਕੀਤਾ। ਸੂਚਨਾ ਮਿਲਣ ‘ਤੇ ਜੰਗਲੀ ਜੀਵ ਵਿਭਾਗ ਦੇ ਅਧਿਕਾਰੀ ਮੌਕੇ ‘ਤੇ ਪਹੁੰਚੇ ਅਤੇ ਘਟਨਾ ਦਾ ਜਾਇਜ਼ਾ ਲਿਆ। ਦਾਤਾਰਪੁਰ ਪਸ਼ੂ ਹਸਪਤਾਲ ਦੀ ਡਾ. ਪੂਨਮ ਸ਼ਰਮਾ ਨੇ ਵੱਛੀ ਦਾ ਪੋਸਟਮਾਰਟਮ ਕੀਤਾ। ਵਣ ਗਾਰਡ ਗੁਰਮੇਲ ਸਿੰਘ ਨੇ ਪਿੰਡ ਵਾਸੀਆਂ ਨੂੰ ਚੌਕਸ ਰਹਿਣ ਦੀ ਸਲਾਹ ਦਿੱਤੀ। ਉਨ੍ਹਾਂ ਕਿਹਾ ਕਿ ਰਾਤ ਨੂੰ ਆਪਣੇ ਘਰਾਂ ਦੇ ਬਾਹਰ ਲਾਈਟਾਂ ਜਗਾ ਕੇ ਰੱਖਣ। ਲੋੜ ਪੈਣ ‘ਤੇ ਪਿੰਜਰਾ ਵੀ ਲਗਾਇਆ ਜਾਵੇਗਾ। ਜਿਵੇਂ ਹੀ ਪਿੰਡ ਵਿੱਚ ਤੇਂਦੁਏ ਦੇ ਘੁੰਮਣ ਦੀ ਖ਼ਬਰ ਫੈਲੀ, ਲੋਕ ਘਬਰਾ ਗਏ।