ਨਵੀਂ ਦਿੱਲੀ: ਖਾਣ-ਪੀਣ ਵਾਲੀਆਂ ਵਸਤੂਆਂ, ਬਾਲਣ ਤੇ ਬਿਜਲੀ ਦੇ ਭਾਅ ਨਾਲ ਤੇਜ਼ੀ ਨਾਲ ਥੋਕ ਮੁੱਲ ਸੂਚਕ ਅੰਕ ’ਤੇ ਅਧਾਰਤ ਮਹਿੰਗਾਈ ਦਰ ਫਰਵਰੀ ’ਚ ਵਧ ਕੇ 4.17 ਫ਼ੀਸਦੀ ’ਤੇ ਪਹੁੰਚ ਗਈ ਹੈ। ਲਗਾਤਾਰ ਦੂਜੇ ਮਹੀਨੇ ਵੀ ਵਾਧਾ ਦੇਖਣ ਨੂੰ ਮਿਲਿਆ।
ਇਸ ਸਾਲ ਜਨਵਰੀ ’ਚ ਮਹਿੰਗਾਈ 2.30 ਫ਼ੀਸਦੀ ’ਤੇ ਰਹੀ ਸੀ। ਇਸ ਨਾਲੋਂ ਪਿਛਲੇ ਸਾਲ ਭਾਵ 2020 ਦੇ ਫਰਵਰੀ ’ਚ ਮਹਿੰਗਾਈ ਦਰ 2.26 ਫ਼ੀਸਦੀ ’ਤੇ ਰਹੀ ਸੀ। ਫਰਵਰੀ ’ਚ ਖਾਣ-ਪੀਣ ਵਾਲੀਆਂ ਵਸਤੂਆਂ ਦੀ ਕੀਮਤ ’ਚ 1.36 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ ਸੀ। ਇਸ ਤੋਂ ਪਹਿਲਾਂ ਜਨਵਰੀ ’ਚ ਇਨ੍ਹਾਂ ’ਚ 2.80 ਫ਼ੀਸਦੀ ਦੀ ਗਿਰਾਵਟ ਆਈ ਸੀ। ਖਾਣ ਵਾਲੀਆਂ ਵਸਤੂਆਂ ਦੀ ਕੀਮਤ ’ਚ ਕਈ ਮਹੀਨੇ ਨਰਮੀ ਤੋਂ ਬਾਅਦ ਫਰਵਰੀ ’ਚ ਥੋੜ੍ਹੀ ਤੇਜ਼ੀ ਦੇਖਣ ਨੂੰ ਮਿਲੀ ਹੈ। ਫਰਵਰੀ ’ਚ ਦਾਲਾਂ ਦੀਆਂ ਕੀਮਤਾਂ ’ਚ 10.25 ਫ਼ੀਸਦੀ ਵਾਧਾ ਦੇਖਣ ਨੂੰ ਮਿਲਿਆ ਹੈ। ਦੂਜੇ ਪਾਸੇ, ਫਲਾਂ ਦੇ ਭਾਅ ’ਚ 9.48 ਫ਼ੀਸਦੀ, ਬਾਲਣ ਤੇ ਬਿਜਲੀ ਦੇ ਭਾਅ ’ਚ 0.58 ਫ਼ੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ। ਪਿਛਲੇ ਹਫ਼ਤੇ ਜਾਰੀ ਅੰਕੜਿਆਂ ਮੁਤਾਬਕ ਫਰਵਰੀ ’ਚ ਖਪਤਕਾਰ ਕੀਮਤ ਸੂਚਕ ਅੰਕ ’ਤੇ ਆਧਾਰਤ ਖੁਦਰਾ ਮਹਿੰਗਾਈ ਦਰ 5.03 ਫ਼ੀਸਦੀ ’ਤੇ ਰਹੀ ਸੀ।
ਭਾਰਤੀ ਰਿਜ਼ਰਵ ਬੈਂਕ ਨੇ ਪਿਛਲੇ ਮਹੀਨੇ ਮੁਦਰਾ ਨੀਤੀ ਕਮੇਟੀ ਦੀ ਬੈਠਕ ’ਚ ਲਗਾਤਾਰ ਚੌਥੀ ਵਾਰ ਨੀਤੀਗਤ ਵਿਆਜ ਦਰਾਂ ’ਚ ਕਿਸੇ ਤਰ੍ਹਾਂ ਦਾ ਬਦਲਾਅ ਨਹੀਂ ਕੀਤਾ ਸੀ।
ਮਹਿੰਗਾਈ ਦਾ ਅੰਕੜਾ ਰੈਪੋ ਰੇਟ ਦੇ ਨਿਰਧਾਰਣ ’ਚ ਕਾਫੀ ਅਹਿਮ ਹੁੰਦਾ ਹੈ। ਸਰਕਾਰ ਨੇ ਰਿਜ਼ਰਵ ਬੈਂਕ ਨੂੰ ਮਹਿੰਗਾਈ ਦਰ ਨੂੰ 2-6 ਫ਼ੀਸਦੀ ’ਚ ਸੀਮਤ ਰੱਖਣ ਦਾ ਟੀਚਾ ਦਿੱਤਾ ਹੈ।