ਅੰਮ੍ਰਿਤਸਰ:ਇੰਜ਼ੀਨੀਅਰਿੰਗ ਮੋਕਸ਼ਾਗੁੰਡਮ ਵਿਸਵੇਸਵਰਿਆ ਦੇ ਜਨਮ ਦਿਨ ਨੂੰ ਸਮਰਪਿਤ ਖਾਲਸਾ ਕਾਲਜ ਆਫ਼ ਇੰਜੀਨੀਅਰਿੰਗ ਐਂਡ ਟੈਕਨਾਲੌਜੀ, ਰਣਜੀਤ ਐਵੀਨਿਊ ਵਿਖੇ ‘ਇੰਜੀਨੀਅਰ ਦਿਵਸ’ ਮਨਾਇਆ ਗਿਆ। ਇਸ ਮੌਕੇ ‘ਐਡਵਾਂਸਮੈਂਟ ਇਨ ਇੰਜੀਨੀਅਰਿੰਗ ਕੈਰੀਅਰ ਪੋਸਟ ‘ਕੋਵਿਡ-19’ (ਵੱਖ-ਵੱਖ ਖੇਤਰਾਂ ’ਚ) ਵਿਸ਼ੇ ’ਤੇ ਈ-ਕਨਕਲੇਵ ਦਾ ਆਯੋਜਨ ਐਮ. ਐਚ. ਆਰ. ਡੀ., ਇੰਸਟੀਚਿਊਟ ਇਨਓਵੇਸ਼ਨ ਕੌਂਸਲ ਅਤੇ ਏ. ਆਈ. ਸੀ. ਟੀ. ਈ. ਦੀ ਯੋਗ ਅਗਵਾਈ ਹੇਠ ਕਰਵਾਇਆ ਗਿਆ।
ਇਸ ਮੌਕੇ ਵੱਖ -ਵੱਖ ਖੇਤਰਾਂ ਦੇ 5 ਨਾਮਵਰ ਬੁਲਾਰੇ ਜਿਨ੍ਹਾਂ ’ਚ ਸ਼੍ਰੀ ਰਾਜੀਵ ਸਜਦੇਹ (ਸੀ. ਆਈ. ਆਈ. ਚੇਅਰਮੈਨ), ਡਾ. ਸ਼ਵੇਤਾ (ਬੌਧਿਕ ਸੰਪਤੀ ਅਧਿਕਾਰਾਂ ਦੇ ਮਾਹਿਰ), ਸ਼੍ਰੀ ਦੀਪਾਂਸ਼ੂ ਪਰਾਸ਼ਰ (ਯੰਗੇਸਟ ਸਾਈਬਰ ਸੁਰੱਖਿਆ ਲੇਖਕ), ਇੰਜ਼. ਹਰਮਨਦੀਪ ਕੌਰ (ਟੀਮ ਲੀਡ, ਕੈਪੇਗਿਮਨੀ) ਅਤੇ ਸ੍ਰੀ ਸਾਜਨ ਅਨੇਜਾ (ਇੰਟਰਪਰਨਿਓਅਰ ਅਤੇ ਐਮ. ਡੀ. ਅਨੇਜਾ ਐਫ਼ ਐਂਡ ਬੀ) ਨੇ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ।
ਇਸ ਮੌਕੇ ਕਾਲਜ ਡਾਇਰੈਕਟਰ ਡਾ. ਮੰਜੂ ਬਾਲਾ ਨੇ ਸਾਰੇ ਫੈਕਲਟੀ ਮੈਂਬਰਾਂ, ਵਿਦਿਆਰਥੀਆਂ ਅਤੇ ਸਟਾਫ ਨੂੰ ਇੰਜੀਨੀਅਰ ਦਿਵਸ ਦੀ ਵਧਾਈ ਦਿੰਦਿਆਂ ਕਿਹਾ ਕਿ ਉਭਰਦੇ ਇੰਜੀਨੀਅਰਾਂ ਲਈ ਅਜਿਹੇ ਸਮਾਗਮਾਂ ਦਾ ਬਹੁਤ ਮਹੱਤਵ ਹੈ। ਉਨ੍ਹਾਂ ਕਿਹਾ ਕਿ ਇੰਜੀਨੀਅਰਿੰਗ ਸਿਰਫ਼ ਸਿੱਖਣਾ ਹੀ ਨਹੀਂ ਹੈ, ਬਲਕਿ ਇਹ ਸਮਾਜ ਦੀ ਬਿਹਤਰੀ ਲਈ ਨਵੀਨਤਾਕਾਰੀ ਵਿਚਾਰਾਂ ਨੂੰ ਸਿਰਜਣ ਅਤੇ ਲਾਗੂ ਕਰਨ ਬਾਰੇ ਹੈ। ਉਨ੍ਹਾਂ ਕਿਹਾ ਕਿ ਹੁਣ ਸਮਾਂ ਆ ਗਿਆ ਹੈ ਕਿ ਇੰਜੀਨੀਅਰਾਂ ਨੂੰ ਸਟਾਰਟਅਪਸ ਅਤੇ ਇੰਟਰਪਰਨਿਓਅਰਸ਼ਿਪ ਵੱਲ ਖ਼ਾਸ ਧਿਆਨ ਦੇਣਾ ਚਾਹੀਦਾ ਹੈ ਤਾਂ ਜੋ ਉਹ ਨੌਕਰੀਆਂ ਪੈਦਾ ਕਰ ਸਕਣ।
ਇਸ ਮੌਕੇ ਸ੍ਰੀ ਸਜਦੇਹ ਨੇ ਵੱਖ -ਵੱਖ ਖੇਤਰਾਂ ਜਿਵੇਂ ਕਿ ਸਰਕਾਰੀ, ਜਨਤਕ ਅਤੇ ਨਿੱਜੀ ਖੇਤਰਾਂ ’ਚ ਇੰਜੀਨੀਅਰਿੰਗ ਦੀ ਮਹੱਤਤਾ ਬਾਰੇ ਚਾਨਣਾ ਪਾਇਆ। ਉਨ੍ਹਾਂ ਨੇ ਉਦਯੋਗਿਕ ਖੇਤਰ ਦੇ ਆਪਣੇ ਤਜ਼ਰਬੇ ਨੂੰ ਸਟਾਫ਼ ਨਾਲ ਸਾਂਝਾ ਕੀਤਾ। ਡਾ. ਸ਼ਵੇਤਾ ਨੇ ਵਿਦਿਆਰਥੀਆਂ ਨੂੰ ਬਿਜ਼ਨਸ ਸਟਾਰਟਅਪਸ ਅਤੇ ਪੇਟੈਂਟਸ ਲਈ ਆਈ. ਪੀ. ਆਰ. ਬਾਰੇ ਜਾਗਰੂਕ ਕਰਦਿਆਂ ਕਿਹਾ ਕਿ ਅਜੋਕੇ ਸਮੇਂ ’ਚ ਉਕਤ ਵਿਸ਼ੇ ਦੀ ਮਹੱਤਤਾ ਬਹੁਤ ਵੱਧ ਗਈ ਹੈ ਤਾਂ ਜੋ ਜਿਆਦਾ ਤੋਂ ਜਿਆਦਾ ਵਿਦਿਆਰਥੀ ਸਵੈ-ਨਿਰਭਰਤਾ ਦੇ ਸੱਭਿਆਚਾਰ ਨੂੰ ਅਪਨਾ ਸਕਣ।
ਇਸ ਦੌਰਾਨ ਸ਼੍ਰੀ ਪਰਾਸ਼ਰ ਨੇ ਸਾਈਬਰ ਸੁਰੱਖਿਆ ਅਤੇ ਕੋਡਿੰਗ ਦੀ ਮਹੱਤਤਾ ਬਾਰੇ ਗਿਆਨ ਸਰੋਤਿਆਂ ਨਾਲ ਸਾਂਝਾ ਕੀਤਾ। ਜਦ ਕਿ ਸ੍ਰੀ ਅਨੇਜਾ ਨੇ ਇਕ ਇੰਜੀਨੀਅਰ ਵਜੋਂ ਆਪਣਾ ਅਨੁਭਵ ਸਾਂਝਾ ਕੀਤਾ ਅਤੇ ਵਿਦਿਆਰਥੀਆਂ ਨੂੰ ਸਰਕਾਰ ਦੁਆਰਾ ਸਟਾਰਟਅਪਸ ਲਈ ਮੁਹੱਈਆ ਕਰਵਾਈਆਂ ਗਈਆਂ ਵੱਖ-ਵੱਖ ਸਕੀਮਾਂ ਬਾਰੇ ਵੀ ਵਿਸਥਾਰਪੂਰਵਕ ਜਾਣਕਾਰੀ ਦਿੱਤੀ। ਉਨ੍ਹਾਂ ਵਿਦਿਆਰਥੀਆਂ ਨੂੰ ਆਪਣੇੇ ਮੁਕਾਮ ਨੂੰ ਪ੍ਰਾਪਤ ਕਰਨ ਲਈ ਪ੍ਰੇਰਿਤ ਕੀਤਾ। ਇਸ ਮੌਕੇ ਇੰਜ਼. ਹਰਮਨਦੀਪ ਕੌਰ ਨੇ ਕਾਰਪੋਰੇਟ ਜਗਤ ’ਚ ਇਕ ਸਫਲ ਵਿਅਕਤੀ ਬਣਨ ਲਈ ਜ਼ਰੂਰੀ ਹੁਨਰ ਹੋਣ ਸਬੰਧ ਕੀਮਤੀ ਵਿਚਾਰ ਸਾਂਝੇ ਕੀਤੇ। ਪ੍ਰੋਗਰਾਮ ਨੂੰ ਸਫ਼ਲ ਬਣਾਉਣ ਲਈ ਡਾ. ਮਹਿੰਦਰ ਸੰਗੀਤਾ (ਡੀਨ ਅਕਾਦਮਿਕ) ਨੇ ਸਮੂਹ ਬੁਲਾਰਿਆਂ ਅਤੇ ਪ੍ਰਬੰਧਕੀ ਕਮੇਟੀ ਦਾ ਧੰਨਵਾਦ ਕੀਤਾ । ਪ੍ਰੋਗਰਾਮ ਦੀ ਪ੍ਰਬੰਧਕੀ ਕਮੇਟੀ ’ਚ ਡਾ. ਰਿਪਿਨ ਕੋਹਲੀ (ਡੀਨ, ਆਰ ਐਂਡ ਸੀ), ਡਾ. ਜੁਗਰਾਜ ਸਿੰਘ, ਸ਼੍ਰੀ ਪੀ. ਪ੍ਰਸ਼ਾਂਤ ਅਤੇ ਇੰਜ਼: ਮਨੀਤ ਕੌਰ ਨੇ ਯੋਗਦਾਨ ਪਾਇਆ।