ਮਹਾਰਾਸ਼ਟਰ, 20 ਜੂਨ: ਮਹਾਰਾਸ਼ਟਰ ਦੇ ਪਰਭਾਣੀ ਜ਼ਿਲ੍ਹੇ ਦੇ ਯਸ਼ਵਾੜੀ ਦੇਵਸਥਾਨ ਵਿੱਚ ਨਿਰਮਾਣ ਅਧੀਨ ਹਨੂੰਮਾਨ ਮੰਦਰ ਹਾਲ ਦੀ ਛੱਤ ਸ਼ਨੀਵਾਰ ਦੁਪਹਿਰ ਨੂੰ ਡਿੱਗ ਗਈ। ਮਲਬੇ ਹੇਠ ਦੱਬਣ ਕਾਰਨ ਸੱਤ ਲੋਕਾਂ ਦੀ ਮੌਤ ਹੋ ਗਈ ਅਤੇ 25 ਜ਼ਖਮੀ ਹੋ ਗਏ ਜਿਨ੍ਹਾਂ ਨੂੰ ਹਸਪਤਾਲ ਲਿਜਾਇਆ ਗਿਆ ਹੈ। ਰਿਪੋਰਟਾਂ ਅਨੁਸਾਰ, ਮੰਦਰ ਦੇ ਬਿਲਕੁਲ ਸਾਹਮਣੇ ਉਸਾਰੀ ਦਾ ਕੰਮ ਚੱਲ ਰਿਹਾ ਸੀ। ਲੋਕ ਦੁਪਹਿਰ ਵੇਲੇ ਪ੍ਰਸ਼ਾਦ ਲੈ ਰਹੇ ਸਨ ਜਦੋਂ ਅਚਾਨਕ ਮੰਦਰ ਦਾ ਢਾਂਚਾ ਅਤੇ ਪੱਥਰ ਡਿੱਗ ਗਏ।
ਹਾਦਸੇ ਦੀ ਸੀਸੀਟੀਵੀ ਫੁਟੇਜ ਵੀ ਸਾਹਮਣੇ ਆਈ ਹੈ। ਵੀਡੀਓ ਦੇ ਅਨੁਸਾਰ, ਦੁਪਹਿਰ 3 ਵਜੇ, ਬਹੁਤ ਸਾਰੇ ਲੋਕ ਪ੍ਰਸ਼ਾਦ ਲੈਣ ਅਤੇ ਪ੍ਰਾਰਥਨਾ ਕਰਨ ਲਈ ਲਾਈਨ ਵਿੱਚ ਖੜ੍ਹੇ ਸਨ ਜਦੋਂ ਬਾਂਸ ਅਤੇ ਲੋਹੇ ਦੀਆਂ ਰਾਡਾਂ ਨਾਲ ਬਣਿਆ ਸੈਂਟਰਿੰਗ ਢਾਂਚਾ ਢਹਿ ਗਿਆ। ਕਿਉਂਕਿ ਅੱਜ ਸ਼ਨੀਵਾਰ ਦਾ ਦਿਨ ਸੀ, ਇਸ ਲਈ ਮੰਦਰ ਵਿੱਚ ਭੀੜ ਸੀ। ਹਾਦਸੇ ਤੋਂ ਬਾਅਦ, ਪੁਲਿਸ ਅਤੇ ਸਥਾਨਕ ਪ੍ਰਸ਼ਾਸਨ ਨੇ ਮੌਕੇ 'ਤੇ ਬਚਾਅ ਕਾਰਜ ਸ਼ੁਰੂ ਕੀਤਾ।
ਯਸ਼ਾਵੜੀ ਪਿੰਡ ਛਤਰਪਤੀ ਸੰਭਾਜੀਨਗਰ ਤੋਂ ਲਗਭਗ 190 ਕਿਲੋਮੀਟਰ ਦੂਰ ਮਾਨਵਤ ਰੋਡ 'ਤੇ ਸਥਿਤ ਹੈ। ਇੱਥੇ ਤ੍ਰਿਮੂਰਤੀ ਮੰਦਰ ਵਿੱਚ ਹਨੂੰਮਾਨ ਜੀ ਦੀ ਕਾਲੀ ਮੂਰਤੀ ਸਥਾਪਿਤ ਹੈ।