ਨਵੀਂ ਦਿੱਲੀ: ਭਾਰਤ ਦੇ ਡਰੱਗਜ਼ ਕੰਟਰੋਲਰ ਜਨਰਲ (ਡੀਸੀਜੀਆਈ) ਨੇ ਮੁੰਬਈ ਦੀ ਦਵਾਈ ਕੰਪਨੀ ਸਿਪਲਾ ਨੂੰ ਐਮਰਜੈਂਸੀ ਵਰਤੋਂ ਲਈ ਮੌਡਰਨਾ ਦੀ ਕੋਰੋਨਾ ਵੈਕਸੀਨ ਨੂੰ ਦਰਾਮਦ ਕਰਨ ਦੀ ਮਨਜ਼ੂਰੀ ਦੇ ਦਿੱਤੀ ਹੈ। ਕੋਵੀਸ਼ੀਲਡ, ਕੋਵੈਕਸੀਨ ਅਤੇ ਸਪੂਤਨਿਕ ਤੋਂ ਬਾਅਦ ਮੌਡਰਨਾ ਦੀ ਵੈਕਸੀਨ ਭਾਰਤ ’ਚ ਉਪਲੱਬਧ ਹੋਣ ਵਾਲੀ ਕੋਰੋਨਾ ਦੀ ਚੌਥੀ ਵੈਕਸੀਨ ਹੋਵੇਗੀ। ਸੂਤਰਾਂ ਨੇ ਦੱਸਿਆ ਕਿ ਡੀਸੀਜੀਆਈ ਨੇ ਡਰੱਗਜ਼ ਐਂਡ ਕਾਸਮੈਟਿਕਸ ਐਕਟ 1940 ਤਹਿਤ ਸਿਪਲਾ ਨੂੰ ਦੇਸ਼ ’ਚ ਸੀਮਤ ਐਮਰਜੈਂਸੀ ਹਾਲਾਤ ਲਈ ਮਾਡਰਨਾ ਟੀਕੇ ਦੀ ਦਰਾਮਦ ਕਰਨ ਦੀ ਮਨਜ਼ੂਰੀ ਦਿੱਤੀ ਹੈ।
ਮੌਡਰਨਾ ਨੇ ਇੱਕ ਪੱਤਰ ’ਚ 27 ਜੂਨ ਨੂੰ ਡੀਸੀਜੀਆਈ ਨੂੰ ਦੱਸਿਆ ਕਿ ਅਮਰੀਕੀ ਸਰਕਾਰ ਜਿੱਥੇ ਵਰਤੋਂ ਲਈ ਕੋਰੋਨਾ ਟੀਕੇ ਦੀ ਇਕ ਵਿਸ਼ੇਸ਼ ਸੰਖਿਆ ’ਚ ਖੁਰਾਕ ਕੋਵੈਕਸ ਜ਼ਰੀਏ ਭਾਰਤ ਸਰਕਾਰ ਨੂੰ ਦੇਣ ਲਈ ਸਹਿਮਤ ਹੋ ਗਈ ਹੈ। ਨਾਲ ਹੀ ਉਸ ਨੇ ਇਸ ਦੇ ਲਈ ਸੈਂਟਰਲ ਡਰੱਗਜ਼ ਸਟੈਂਡਰਡ ਕੰਟਰੋਲਰ ਆਰਗੇਨਾਈਜ਼ੇਸ਼ਨ (ਸੀਡੀਐੱਸਸੀਓ) ਤੋਂ ਮਨਜ਼ੂਰੀ ਮੰਗੀ ਹੈ। ਸਿਪਲਾ ਨੇ ਸੋਮਵਾਰ ਨੂੰ ਅਮਰੀਕੀ ਫਾਰਮਾ ਕੰਪਨੀ ਵੱਲੋਂ ਇਨ੍ਹਾਂ ਦਵਾਈਆਂ ਦੀ ਦਰਾਮਦ ਲਈ ਡਰੱਗਜ਼ ਰੈਗੂਲੇਟਰੀ ਨੂੰ ਬੇਨਤੀ ਕੀਤੀ ਸੀ। ਇਕ ਅਧਿਕਾਰੀ ਨੇ ਕਿਹਾ ਕਿ ਐਮਰਜੈਂਸੀ ਹਾਲਾਤ ’ਚ ਸੀਮਤ ਵਰਤੋਂ ਲਈ ਇਹ ਮਨਜ਼ੂਰੀ ਲੋਕਾਂ ਦੇ ਹਿੱਤ ਵਿਚ ਹੈ। ਕੰਪਨੀ ਨੂੰ ਟੀਕਾਕਰਨ ਪ੍ਰੋਗਰਾਮ ਲਈ ਟੀਕੇ ਦੀ ਵਰਤੋਂ ਸ਼ੁਰੂ ਕਰਨ ਤੋਂ ਪਹਿਲਾਂ ਪਹਿਲੇ 100 ਲਾਭਪਾਤਰੀਆਂ ਨੂੰ ਲਗਾਏ ਗਏ ਟੀਕੇ ਦਾ ਉਨ੍ਹਾਂ ਦੀ ਸਿਹਤ ਸਬੰਧੀ ਜਾਇਜ਼ਾ ਲੈਣਾ ਹੋਵੇਗਾ। ਸਿਪਲਾ ਨੇ ਸੋਮਵਾਰ ਨੂੰ ਇਕ ਅਰਜ਼ੀ ਦੇ ਕੇ ਇਸ ਟੀਕੇ ਦੀ ਦਰਾਮਦ ਦੀ ਮਨਜ਼ੂਰੀ ਮੰਗੀ ਸੀ। ਇਸ ਸਿਲਸਿਲੇ ਵਿਚ ਉਸ ਨੇ 15 ਅਪ੍ਰੈਲ ਅਤੇ ਇਕ ਜੂਨ ਦੇ ਡੀਸੀਜੀਆਈ ਨੋਟਿਸ ਦਾ ਹਵਾਲਾ ਦਿੱਤਾ ਸੀ।