ਪਟਨਾ:ਬਿਹਾਰ ਵਿਧਾਨ ਸਭਾ ਚੋਣਾਂ ਦੇ ਪਹਿਲੇ ਗੇੜ 'ਚ 71 ਸੀਟਾਂ 'ਤੇ 28 ਅਕਤੂਬਰ ਬੁੱਧਵਾਰ ਨੂੰ ਪੈਣ ਵਾਲੀਆਂ ਵੋਟਾਂ ਲਈ ਚੋਣ ਪ੍ਰਚਾਰ ਸੋਮਵਾਰ ਸ਼ਾਮ ਨੂੰ ਬੰਦ ਹੋ ਗਿਆ ਹੈ। ਪਟਨਾ, ਬਕਸਰ, ਭੋਜਪੁਰ ਸਮੇਤ 16 ਜ਼ਿਲ੍ਹਿਆਂ ਦੀਆਂ 71 ਸੀਟਾਂ ਲਈ 1, 066 ਉਮੀਦਵਾਰ ਮੈਦਾਨ 'ਚ ਹਨ। ਚੋਣ ਪ੍ਰਚਾਰ ਦੇ ਆਖਰੀ ਦਿਨ ਐਨਡੀਏ ਗਠਜੋੜ ਤੇ ਹੋਰਨਾਂ ਸਿਆਸੀ ਪਾਰਟੀਆਂ ਨੇ ਆਪੋ-ਆਪਣੇ ਉਮੀਦਵਾਰਾਂ ਦੇ ਹੱਕ 'ਚ ਵੱਡੀਆਂ ਰੈਲੀਆਂ ਕੀਤੀਆਂ ਅਤੇ ਵੋਟਰਾਂ ਨੂੰ ਆਪਣੇ ਹੱਕ 'ਚ ਭੁਗਤਾਉਣ ਦਾ ਪੂਰਾ ਯਤਨ ਕੀਤਾ।
54 ਥਾਵਾਂ 'ਤੇ ਸਿੱਧਾ ਅਤੇ 17 ਸੀਟਾਂ 'ਤੇ ਤਿਕੋਣਾਂ ਮੁਕਾਬਲਾ ਦੱਸਿਆ ਜਾ ਰਿਹਾ ਹੈ। 114 ਮਹਿਲਾਵਾਂ ਵੀ ਚੋਣ ਮੈਦਾਨ 'ਚ ਹਨ। 2 ਕਰੋੜ 14 ਲੱਖ 6 ਹਜ਼ਾਰ 96 ਵੋਟਰ ਆਪਣੇ ਵੋਟ ਦੇ ਅਧਿਕਾਰ ਦੀ ਵਰਤੋਂ ਕਰਨਗੇ। ਚੋਣ ਕਮਿਸ਼ਨ ਵੱਲੋਂ ਪਹਿਲੇ ਗੇੜ ਦੀਆਂ ਵੋਟਾਂ ਦਾ ਕੰਮ ਅਮਨ ਅਮਾਨ ਨਾਲ ਨੇਪਰੇ ਚਾੜ੍ਹਨ ਲਈ ਤਿਆਰੀਆਂ ਮੁਕੰਮਲ ਕਰ ਲਈਆਂ ਗਈਆਂ ਹਨ।
ਪਹਿਲੇ ਗੇੜ ਦੀਆਂ 71 ਸੀਟਾਂ 'ਚੋਂ 42 ਸੀਟਾਂ 'ਤੇ ਆਰਜੇਡੀ ਦੇ ਉਮੀਦਵਾਰ ਮੈਦਾਨ 'ਚ ਹਨ, 21 ਸੀਟਾਂ 'ਤੇ ਕਾਂਗਰਸ ਦੇ। ਜਦੋਂਕਿ ਪ੍ਰਮੁੱਖ ਪਾਰਟੀਆਂ 'ਚੋਂ 41 ਸੀਟਾਂ 'ਤੇ ਜੇਡੀਯੂ ਦੇ ਉਮੀਦਵਾਰ ਅਤੇ 29 ਸੀਟਾਂ 'ਤੇ ਭਾਜਪਾ ਦੇ ਉਮੀਦਵਾਰ ਚੋਣ ਮੈਦਾਨ 'ਚ ਹਨ। ਇਸੇ ਤਰ੍ਹਾਂ ਐਲਜੇਪੀ ਦੇ ਉਮੀਦਵਾਰ 41 ਸੀਟਾਂ 'ਤੇ ਮੈਦਾਨ 'ਚ ਹਨ।
ਪਹਿਲੇ ਗੇੜ 'ਚ ਮੌਜ਼ੂਦਾ ਨਿਤਿਸ਼ ਕੁਮਾਰ ਸਰਕਾਰ ਦੇ 8 ਮੰਤਰੀਆਂ ਦੀ ਕਿਸਮਤ ਦਾਅ 'ਤੇ ਲੱਗੀ ਹੋਈ ਹੈ। ਵਿਧਾਨ ਸਭਾ ਚੋਣਾਂ ਦੇ ਪਹਿਲੇ ਗੇੜ ਦੇ ਪ੍ਰਚਾਰ 'ਚ ਐਨਡੀਏ ਲਈ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨੇ 3 ਰੈਲੀਆਂ ਨੂੰ ਸੰਬੋਧਨ ਕਰਦਿਆਂ ਵੋਟਰਾਂ ਨੂੰ ਮੁੱਖ ਮੰਤਰੀ ਨਿਤਿਸ਼ ਕੁਮਾਰ ਨੂੰ ਮੁੜ ਸੱਤਾ 'ਚ ਲਿਆਉਣ ਦੀ ਅਪੀਲ ਕੀਤੀ ਉਧਰ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਰਾਹੁਲ ਗਾਂਧੀ ਨੇ ਮਹਾਗਠਜੋੜ ਲਈ 2 ਰੈਲੀਆਂ ਕਰਕੇ ਤੇਜੱਸਵੀ ਯਾਦਵ ਨੂੰ ਮੁੱਖ ਮੰਤਰੀ ਬਣਾਉਣ ਲਈ ਵੋਟਾਂ ਮੰਗੀਆਂ। ਰਾਹੁਲ ਗਾਂਧੀ ਸਮੇਤ ਤੇਜੱਸਵੀ ਯਾਦਵ ਤੇ ਮਹਾਗਠਜੋੜ ਦੇ ਹੋਰਨਾਂ ਆਗੂਆਂ ਨੇ ਰੈਲੀਆਂ ਕਰਕੇ ਖੇਤੀ ਕਾਨੂੰਨ, ਜੀਐਸਟੀ, ਕੋਰੋਨਾ ਕਾਲ 'ਚ ਮਜ਼ਦੂਰਾਂ ਦੀ ਦੁਰਦਸ਼ਾ ਨੂੰ ਮੁੱਖ ਮੁੱਦਾ ਬਣਾਇਆ।
ਐਨਡੀਏ ਉਮੀਦਵਾਰਾਂ ਦੇ ਹੱਕ 'ਚ ਯੋਗੀ ਅਦਿੱਤਿਆ ਨਾਥ, ਪਾਰਟੀ ਪ੍ਰਧਾਨ ਜਗਤ ਪ੍ਰਕਾਸ਼ ਨੱਢਾ ਜਿਹੇ ਹੋਰ ਭਾਜਪਾ ਸਟਾਰ ਪ੍ਰਚਾਰਕਾਂ ਨੇ ਰੈਲੀਆਂ ਕੀਤੀਆਂ। ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨੇ ਜੰਮੂ-ਕਸ਼ਮੀਰ 'ਚ ਧਾਰਾ 370 ਨੂੰ ਖ਼ਤਮ ਕਰਨ ਜਿਹੇ ਮੁੱਦੇ ਉਠਾਏ।
ਦੱਸਣਯੋਗ ਹੈ ਕਿ ਬਿਹਾਰ ਵਿਧਾਨ ਸਭਾ ਚੋਣਾਂ ਲਈ 243 ਸੀਟਾਂ 'ਤੇ ਵੋਟਾਂ ਪੈਣਗੀਆਂ । ਤਿੰਨ ਗੇੜਾਂ 'ਚ ਵੋਟਿੰਗ ਹੋਵੇਗੀ ਜੋ ਕਿ 28 ਅਕਤੂਬਰ ਨੂੰ 71 ਸੀਟਾਂ 'ਤੇ, ਦੂਜੇ ਗੇੜ 'ਚ 3 ਨਵੰਬਰ ਨੂੰ 94 ਸੀਟਾਂ 'ਤੇ ਅਤੇ ਤੀਜੇ ਗੇੜ 'ਚ 7 ਨਵੰਬਰ ਨੂੰ 78 ਸੀਟਾਂ 'ਤੇ ਵੋਟਾਂ ਪੈਣਗੀਆਂ ਅਤੇ 10 ਨਵੰਬਰ ਨੂੰ ਵੋਟਾਂ ਦੇ ਨਤੀਜੇ ਐਲਾਨੇ ਜਾਣਗੇ।
ਜ਼ਿਕਰਯੋਗ ਹੈ ਕਿ ਮਹਾਗਠਜੋੜ ਦੀਆਂ ਰੈਲੀਆਂ 'ਚ ਇਸ ਵਾਰ ਲੋਕਾਂ ਦਾ ਠਾਠਾਂ ਮਾਰਦਾ ਇਕੱਠ ਦੇਖਿਆ ਗਿਆ, ਜਿਸ ਨੇ ਮੁੱਖ ਮੰਤਰੀ ਨਿਤਿਸ਼ ਕੁਮਾਰ ਨੂੰ ਸੋਚਾਂ 'ਚ ਪਾਇਆ ਹੋਇਆ ਹੈ।