ਚੰਡੀਗੜ੍ਹ: ਚੰਡੀਗੜ੍ਹ: ਭਾਜਪਾ ਦੇ ਰਾਜ ਸਭਾ ਮੈਂਬਰ ਰਾਘਵ ਚੱਢਾ ਦੀ ਵੋਟ ਨੂੰ ਲੈ ਕੇ ਚੱਲ ਰਹੇ ਵਿਵਾਦ ਵਿਚ ਆਮ ਆਦਮੀ ਪਾਰਟੀ ਨੇ ਵੀ ਮੋਰਚਾ ਖੋਲ੍ਹ ਦਿੱਤਾ ਹੈ। AAP ਆਗੂ ਅਨੁਰਾਗ ਢਾਂਡਾ ਨੇ ਮੋਹਾਲੀ ਦੇ ਫਲੈਟ ਨੰਬਰ 103 ਦੀ ਵੀਡੀਓ ਦਿਖਾਉਂਦਿਆਂ ਦਾਅਵਾ ਕੀਤਾ ਕਿ ਉੱਥੇ ਕੋਈ ਨਹੀਂ ਰਹਿੰਦਾ। ਉਨ੍ਹਾਂ ਨੇ ਰਾਘਵ ਚੱਢਾ ’ਤੇ ਬੈਕਡੇਟ ਵਿੱਚ ਵੋਟ ਬਣਵਾਉਣ ਦੇ ਦੋਸ਼ ਲਗਾਉਂਦਿਆਂ ਕਈ ਸਵਾਲ ਖੜ੍ਹੇ ਕੀਤੇ। ਢਾਂਡਾ ਨੇ ਕਿਹਾ ਕਿ ਜੇਕਰ 30 ਅਗਸਤ ਤੋਂ ਬਾਅਦ ਦਿੱਲੀ ਦੀ ਡਰਾਫਟ ਵੋਟਰ ਲਿਸਟ ਵਿੱਚ ਰਾਘਵ ਚੱਢਾ ਦਾ ਨਾਮ ਨਹੀਂ ਸੀ ਤਾਂ ਬਾਅਦ ਵਿੱਚ ਇਹ ਕਿਵੇਂ ਸ਼ਾਮਲ ਹੋ ਗਿਆ। ਉਨ੍ਹਾਂ ਸਵਾਲ ਕੀਤਾ ਕਿ ਬਿਨਾਂ ਫਾਰਮ ਭਰੇ ਵੋਟਰ ਲਿਸਟ ਵਿੱਚ ਨਾਮ ਕਿਵੇਂ ਜੋੜਿਆ ਗਿਆ। ਉਨ੍ਹਾਂ ਭਾਜਪਾ ’ਤੇ ਵੀ ਨਿਸ਼ਾਨਾ ਸਾਧਦਿਆਂ ਕਿਹਾ ਕਿ ਪਾਰਟੀ ਕਿਸੇ ਦੀ ਵੀ ਵੋਟ ਕਟਵਾ ਸਕਦੀ ਹੈ।
ਮੋਹਾਲੀ ਦੇ ਫਲੈਟ ਦੀ ਵੀਡੀਓ ਦਿਖਾਈ
ਪ੍ਰੈੱਸ ਕਾਨਫਰੰਸ ਦੌਰਾਨ AAP ਨੇ ਇੱਕ ਵੀਡੀਓ ਜਾਰੀ ਕੀਤੀ। ਇਸ ਵਿੱਚ ਇੱਕ ਪੱਤਰਕਾਰ ਸੁਰੱਖਿਆ ਗਾਰਡ ਨਾਲ ਮੋਹਾਲੀ ਸਥਿਤ ਫਲੈਟ ਨੰਬਰ 103 ਵਿੱਚ ਜਾਂਦਾ ਦਿਖਾਈ ਦਿੰਦਾ ਹੈ। ਵੀਡੀਓ ਵਿੱਚ ਗਾਰਡ ਕਹਿੰਦਾ ਹੈ ਕਿ ਉਸ ਨੇ ਰਾਘਵ ਚੱਢਾ ਨੂੰ ਕਦੇ ਉੱਥੇ ਨਹੀਂ ਦੇਖਿਆ ਅਤੇ ਫਲੈਟ ਵਿੱਚ ਵੀ ਕੋਈ ਰਹਿੰਦਾ ਨਹੀਂ ਦਿਖਾਈ ਦਿੰਦਾ। AAP ਨੇ ਫਲੈਟ ਦੀ ਹਾਲਤ ਅਤੇ ਉੱਥੇ ਮੌਜੂਦ ਘੱਟ ਸਾਮਾਨ ਦੇ ਆਧਾਰ ’ਤੇ ਰਾਘਵ ਚੱਢਾ ਦੇ ਪੰਜਾਬ ਦੇ ਵੋਟਰ ਹੋਣ ਦੇ ਦਾਅਵੇ ’ਤੇ ਸਵਾਲ ਚੁੱਕੇ।
ਦਿੱਲੀ ਦੀ ਵੋਟਰ ਲਿਸਟ ਦਾ ਵੀ ਕੀਤਾ ਜ਼ਿਕਰ
ਢਾਂਡਾ ਨੇ ਦਾਅਵਾ ਕੀਤਾ ਕਿ 31 ਅਗਸਤ ਨੂੰ ਜਾਰੀ ਦਿੱਲੀ ਦੀ ਡਰਾਫਟ ਵੋਟਰ ਲਿਸਟ ਵਿੱਚ ਰਾਜਿੰਦਰ ਨਗਰ ਤੋਂ ਰਾਘਵ ਚੱਢਾ ਦਾ ਨਾਮ ਨਹੀਂ ਸੀ। ਉਨ੍ਹਾਂ ਕਿਹਾ ਕਿ ਜੇਕਰ ਉਹ ਦਿੱਲੀ ਵਿੱਚ ਵੋਟ ਬਣਵਾਉਣਾ ਚਾਹੁੰਦੇ ਹਨ ਤਾਂ ਨਿਰਧਾਰਤ ਪ੍ਰਕਿਰਿਆ ਤਹਿਤ ਵੋਟ ਟਰਾਂਸਫਰ ਕਰਵਾਉਣੀ ਪਵੇਗੀ। AAP ਆਗੂ ਨੇ ਇਹ ਵੀ ਕਿਹਾ ਕਿ SIR ਪ੍ਰਕਿਰਿਆ ਤਹਿਤ ਵੋਟਾਂ ਜੋੜਨ ਅਤੇ ਕੱਟਣ ਵਿੱਚ ਮਨਮਾਨੀ ਨਹੀਂ ਹੋਣੀ ਚਾਹੀਦੀ। ਉਨ੍ਹਾਂ ਚੋਣ ਕਮਿਸ਼ਨ ਤੋਂ ਪੂਰੀ ਪ੍ਰਕਿਰਿਆ ਪਾਰਦਰਸ਼ੀ ਢੰਗ ਨਾਲ ਕਰਵਾਉਣ ਅਤੇ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣ ਦੀ ਮੰਗ ਕੀਤੀ।