ਵੱਡੀ ਲਾਪਰਵਾਹੀ ! ਆਰੋਗਿਆ ਕੇਂਦਰ ਦੇ ਵਾਸ਼ਰੂਮ ਵਿੱਚ ਰਾਤਭਰ ਬੰਦ ਰਹੀ ਬਜ਼ੁਰਗ ਮਹਿਲਾ, ਸਟਾਫ ਤਾਲਾ ਲਗਾ ਕੇ ਚਲਾ ਗਿਆ ਘਰ

ਮਲੋਟ: ਮਲੋਟ ਦੇ ਫਾਇਰ ਬ੍ਰਿਗੇਡ ਨੇੜੇ ਸਥਿਤ ਆਯੁਸ਼ਮਾਨ ਆਰੋਗਿਆ ਕੇਂਦਰ ਵਿੱਚ ਲਾਪਰਵਾਹੀ ਦਾ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਦੋਸ਼ ਹੈ ਕਿ ਇੱਕ ਬਜ਼ੁਰਗ ਮਹਿਲਾ ਮਰੀਜ਼ ਵਾਸ਼ਰੂਮ ਵਿੱਚ ਮੌਜੂਦ ਸੀ, ਪਰ ਸਟਾਫ ਨੇ ਹਸਪਤਾਲ ਬੰਦ ਕਰਨ ਤੋਂ ਪਹਿਲਾਂ ਜਾਂਚ ਤੱਕ ਨਹੀਂ ਕੀਤੀ ਅਤੇ ਕੇਂਦਰ ਨੂੰ ਤਾਲਾ ਲਗਾ ਕੇ ਚਲਾ ਗਿਆ। ਦੂਜੇ ਪਾਸੇ ਪਰਿਵਾਰ ਵਾਲੇ ਉਸ ਨੂੰ ਲਾਪਤਾ ਸਮਝ ਕੇ ਸਾਰੀ ਰਾਤ ਦਰ-ਦਰ ਭਟਕਦੇ ਰਹੇ।

ਜਾਣਕਾਰੀ ਮੁਤਾਬਕ ਵਾਰਡ ਨੰਬਰ 10 ਦੀ ਰਹਿਣ ਵਾਲੀ ਇੱਕ ਮਹਿਲਾ ਦਵਾਈ ਲੈਣ ਲਈ ਆਯੁਸ਼ਮਾਨ ਆਰੋਗਿਆ ਕੇਂਦਰ ਪਹੁੰਚੀ ਸੀ। ਇਸ ਦੌਰਾਨ ਉਹ ਵਾਸ਼ਰੂਮ ਵਿੱਚ ਚਲੀ ਗਈ। ਦੋਸ਼ ਹੈ ਕਿ ਡਿਊਟੀ 'ਤੇ ਮੌਜੂਦ ਕਰਮਚਾਰੀਆਂ ਨੇ ਹਸਪਤਾਲ ਬੰਦ ਕਰਨ ਤੋਂ ਪਹਿਲਾਂ ਇਹ ਵੀ ਯਕੀਨੀ ਨਹੀਂ ਬਣਾਇਆ ਕਿ ਅੰਦਰ ਕੋਈ ਮਰੀਜ਼ ਤਾਂ ਨਹੀਂ ਰਹਿ ਗਿਆ। ਨਤੀਜੇ ਵਜੋਂ ਬਜ਼ੁਰਗ ਮਹਿਲਾ ਪੂਰੀ ਰਾਤ ਵਾਸ਼ਰੂਮ ਵਿੱਚ ਹੀ ਬੰਦ ਰਹੀ। ਉੱਧਰ, ਮਹਿਲਾ ਦੇ ਘਰ ਨਾ ਪਰਤਣ 'ਤੇ ਪਰਿਵਾਰ ਨੇ ਉਸ ਦੀ ਭਾਲ ਸ਼ੁਰੂ ਕਰ ਦਿੱਤੀ। ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ ਅਤੇ ਸੋਸ਼ਲ ਮੀਡੀਆ 'ਤੇ ਵੀ ਗੁੰਮਸ਼ੁਦਗੀ ਦੀ ਜਾਣਕਾਰੀ ਸਾਂਝੀ ਕੀਤੀ ਗਈ। ਕਈ ਘੰਟਿਆਂ ਦੀ ਭਾਲ ਤੋਂ ਬਾਅਦ ਬੁੱਧਵਾਰ ਸਵੇਰੇ ਜਦੋਂ ਕੇਂਦਰ ਖੁੱਲਿਆ ਤਾਂ ਮਹਿਲਾ ਵਾਸ਼ਰੂਮ ਵਿੱਚੋਂ ਮਿਲੀ।

ਇਸ ਘਟਨਾ ਨੇ ਆਯੁਸ਼ਮਾਨ ਆਰੋਗਿਆ ਕੇਂਦਰ ਦੀ ਕਾਰਜਪ੍ਰਣਾਲੀ ਅਤੇ ਮਰੀਜ਼ਾਂ ਦੀ ਸੁਰੱਖਿਆ ਨੂੰ ਲੈ ਕੇ ਗੰਭੀਰ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਜੇਕਰ ਹਸਪਤਾਲ ਬੰਦ ਕਰਨ ਤੋਂ ਪਹਿਲਾਂ ਨਿਯਮਾਂ ਅਨੁਸਾਰ ਹਰ ਕਮਰੇ ਅਤੇ ਵਾਸ਼ਰੂਮ ਦੀ ਜਾਂਚ ਕੀਤੀ ਜਾਂਦੀ, ਤਾਂ ਇਹ ਸਥਿਤੀ ਪੈਦਾ ਨਾ ਹੁੰਦੀ। ਮਾਮਲੇ ਬਾਰੇ ਸਿਵਲ ਹਸਪਤਾਲ ਮਲੋਟ ਦੇ ਸੀਨੀਅਰ ਮੈਡੀਕਲ ਅਧਿਕਾਰੀ ਨੇ ਦੱਸਿਆ ਕਿ ਘਟਨਾ ਸਬੰਧੀ ਆਯੁਸ਼ਮਾਨ ਆਰੋਗਿਆ ਕੇਂਦਰ ਦੇ ਸਟਾਫ ਤੋਂ ਲਿਖਤੀ ਸਪਸ਼ਟੀਕਰਨ ਮੰਗਿਆ ਗਿਆ ਹੈ ਅਤੇ ਬਜ਼ੁਰਗ ਮਹਿਲਾ ਦੀ ਸਿਹਤ ਦੀ ਜਾਂਚ ਕਰਵਾਉਣ ਦੇ ਨਿਰਦੇਸ਼ ਵੀ ਜਾਰੀ ਕੀਤੇ ਗਏ ਹਨ।